new zenith_admission
arin enterprises

बुद्धकृष्ण बाग श्रेष्ठले नवौं पटक जिब्रो छेड्दै

SamacharDesk | २०७९ बैशाख २, शुक्रबार

भक्तपुरमा आज जिब्रो छेड्ने जात्रा मनाईंदैछ । यस वर्ष पनि बोडेका ४९ वर्षीय बुद्धकृष्ण वाग श्रेष्ठले नै जिव्रो छेड्ने भएका छन् । हरेक वर्ष वैशाख २ गते मध्यपुरको बोडेमा जिब्रो छेड्ने जात्रा मनाउने परम्परा छ । यो वर्ष उनले नवौं पटक जिब्रो छेडाउन लागेका हुन् ।

जिब्रो छेड्ने व्यक्तिले तीन दिन अघिदेखि केही नखाई व्रत बस्ने गर्दछन् भने व्रत शुरु भएदेखि जिब्रो नछेडेसम्म सुत्नसमेत नहुने मान्यता रहेको छ । जिब्रो छेड्दा पीडा नहोस् भनेर सात दिनदेखि नून समेत नखाने चलन छ । जिब्रो छेड्नुअघि शक्ति प्राप्त होस् भनेर बोडे क्षेत्रका विभिन्न देवीदेवताको पूजाआजा गर्ने गरिन्छ ।

पाँचो गणेशको पाटीमा पुगेपछि जात्राका नकर्मी नाइकेले जिव्रो छेडिदिने गर्दछन् । एक महिना अघिदेखि तेलमा डुबाएर राखेको फलामको १० इञ्च लामो सुइरो जिब्रोमा छेडेने गरिन्छ । त्यसपछि जिव्रो छेड्ने व्यक्तिले महादीप बोकेर एक घण्टा नगर परिक्रमा गरेर बोडेको महालक्ष्मी मन्दिरमा पुगेर सुइरो झिकेपछि जात्राको समापन हुने गर्दछ ।

यसैगरी विस्का जात्राकै त्रममा आजै थिमिमा सिन्दुर जात्रा पनि मनाइँंदै छ । सिद्धिकालीको खट ल्याएर आफ्ना गणहरुसहित बालकुमारी प्रवेश गराएपछि यो जात्रा सुरु हुन्छ ।

जात्रामा थिमिको बालकुमारी, दक्षिणबाराही, विष्णुवीर, सिद्धिकाली, नगदेशको सिद्धिगणेश, बोडेको महालक्ष्मी र टिगनीको नीलबाराही मन्दिरका देवताका नेतृत्वमा खट बोकेर टोलटोलमा अबिर खेल्दै बाजागाजासहित अबिर जात्रा मनाउने चलन छ ।

Categorized in संस्कृति
SKIP THIS Maharjan Complex