झुट्टा विवरण पेश गरी नेपाली नागरिकता लिएको अभियोगमा २ जना बीरगंजबाट पक्राउ परेका छन् ।

प्रहरीले बहुदरमाई नगरपालिका–२ बस्ने ५१ वर्षीय धुरुप प्रसाद पटेल र सोही ठाउँ बस्ने भारतकी २८ वर्षीया कविता कुमारी भन्ने सीता पटेललाई पक्राउ गरेको हो ।

प्रारम्भिक अनुसन्धानमा भारतीय नागरिक सीता पटेलले कविता कुमारीको नामबाट झुट्टा विवरण पेश गरी जिल्ला प्रशासन कार्यालय पर्साबाट नेपाली नागरिकताको प्रमाणपत्र लिएको खुल्न आएको प्रहरीले जनाएको छ ।

घटनाको सूचना प्राप्त भएपछि वडा प्रहरी कार्यालय श्रीपुरबाट खटिएको प्रहरीको टोलीले उनीहरुलाई पक्राउ गरेको हो ।

सिताले धुरुप प्रसाद पटेलको छोरी कविता कुमारीको नामबाट जिल्ला प्रशासन कार्यालय पर्साबाट नागरिकता लिएको प्रहरीले जानकारी दिएको छ ।

सीताको साथबाट २०७० पुस ११ गते जारी भएको ३४–०१–७०–१०३५२ नम्बरको उक्त नेपाली नागरिकता प्रमाणपत्रको प्रतिलिपि बरामद भएको छ ।

प्रहरीले सिता र नागरिकता बनाउन बुवा बनी सनाखत गरिदिने धुरुप प्रसादलाई समेत पक्राउ गरेको हो ।

उनीहरु उपर नागरिकता सम्बन्धी कसूरमा जिल्ला अदालत पर्साबाट ७ दिन म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साले जनाएको छ ।

Categorized in अपराध