पछिल्लो समय बलिउडका लागि एक पछि अर्को दुःखद खबरहरु आइरहेका छन् । बलिउडका चर्चित कलाकार सुसान्त सिंह राजपुतको आत्महत्याको चर्चा सेलाउन नपाउँदै चर्चित कोरीयोग्राफर सरोज खानको निधन भएको छ ।

चर्चित नृत्य निर्देशक सरोज खानको बिहीबार राति १ः५२ मा हृदयघातका कारण मृत्यु भएको हो । 

स्वासप्रश्वासमा समस्या देखिएपछि उनी गत जुन २४ तारिखमा मुम्बईको गुरु नानक अस्पतालमा उनी भर्ना भएकि थिइन् ।

त्यसको केही समयपछि स्वास्थ्यमा सुधार देखिएपछि उनी घर फर्केकि थिइन् । तर विहिवार फेरी स्वास्थ्यमा अचानक समस्या देखिएको थियो ।

मलाडको कब्रिस्तानमा उनको अन्त्येष्टि गरीएको छ ।

तीन दिनपछि उनलाई श्रद्धान्जली दिँदै प्रार्थना सभाको आयोजना गरिने भारतीय सञ्चारमाध्यमहरुले जनाएको छ ।

सन् १९७४ मा आएको ‘गीता मेरा नाम’ चलचित्रबाट बलिउडमा पदार्पण गरेकि उनले आफ्नो ४० वर्षको करियरमा बलिउडका लागि दुई हजार बढी गीतमा कोरियोग्राफी गरेकी छन् । 

बलिउडको एभरग्रीन डान्स नम्बर एक दो तीन गीतको कोरीयोग्राफी सरोजले नै गरेकि थिइन् । साथै मिस्टर इन्डियाको हवाहवाई, देवदासको चर्चित गीत डोला रे कोरीयोग्राफी पनि सरोजकै थियो ।

उनले अन्तिम पटक कंलक चलचित्रका लागि कोरीयोग्राफी गरेकि थिइन् ।

उनले तीन पटक नेशनल अवार्ड जितेकी छन् । 

सरोजका पति बी सोहनलाल, छोरा हामिद र दुई छोरीहरु हिना र सुकन्या छन् । 

२२ नोभेम्बर १९४८ मा जन्मेकी उनको नाम निर्मला नागपाल थियो । पछि मुस्लिम धर्म अपनाइ आफ्नो नाम सरोज खान राखेकी थिइन् ।

Categorized in पेजथ्री