सामाजिक सञ्जाल मार्फत कोभिड–१९ को पिसिआर रिपोर्ट सम्बन्धी अफवाह फैलाएको अभियोगमा कास्कीबाट २ जनालाई प्रहरीले पक्राउ गरेको छ । 

पक्राउ पर्नेहरुमा पर्वत मोदी गाउँपालिका ७ घर भई हाल कास्की पोखरा महानगरपालिका ५ बस्ने २९ वर्षीय ईश्वर रिमाल र चितवन भरतपुर महानगरपालिका ४ घर भई कास्की पोखरा महानगरपालिका ९ नयाँबजार बस्ने २२ वर्षीय निरज लम्साल रहेका छन् । 

रिमाललाई बुधबार तथा लम्साललाई बिहीबार उनीहरुकै निवासबाट प्रहरीले पक्राउ गरेको हो । 

प्रदेश जनस्वास्थ्य प्रयोगशाला गण्डकी प्रदेश पोखराबाट कोभिड–१९ पिसिआर परीक्षण गरेका रिमालको रिपोर्टलाई उनीहरू दुई जना मिलेर बङ्ग्याई सामाजिक सञ्जालमा पोष्ट गरी अफवाह फैलाएपछि प्रहरीले उनीहरूलाई पक्राउ गरेको हो ।  

उनीहरु विरुद्ध अफवाह फैलाउन नहुने सम्बन्धी मुद्दामा म्याद थप गरी अनुसन्धान भइरहेको जिल्ला प्रहरी कार्यालय कास्कीले जनाएको छ ।

Categorized in अपराध