बाँकेको राप्तीसोनारी गाउँपालिकामा विभिन्न हातहतियारसहित एक पुरुष पक्राउ परेका छन् ।

जबरपुर बस्ने ६८ वर्षीय ऋषिराम थारुलाई प्रहरीले विभिन्न हातहतियारसहित आज पक्राउ गरेको हो ।

थारुबाट प्रहरीले दुईनाले १२ बोरको बन्दुक १ थान, भरुवा बन्दुक २ थान, १२ बोरको खोका ३८ वटा, काटेको गोली १२ वटा, बारुद १ केजी, फलामको नाल २ थान, चित्तलको सिङ ४ वटा र बदेलको दाँत १ वटा बरामद गरेको छ ।

विशेष सूचनाको आधारमा ईलाका प्रहरी कार्यालय बैजापुरबाट खटिएको प्रहरी टोलीले ऋषिरामको घर तलासी गर्दा उक्त हातहतियार फेला पारेको हो ।

थप अनुसन्धानको क्रममा सोही कार्यालयबाट खटिएको प्रहरी टोलीले ऋषिरामका भाइ लाल बहादुर थारुको घरबाट पनि विभिन्न हतियार बरामद गरेको छ ।

लालबहादुरको घरको तलासी गर्दा १ थान कटुवा पेस्तोल, थ्रीनटथ्री राईफलको गोली २ थान, एसएलआर राईफलको गोली १ थान र भरुवा बन्दुकको खाली नाल १ थान बरामद गरेको प्रहरीले जनाएको छ ।

लाल बहादुर भने हाल फरार रहेको र उसको खोजी भइरहेको पनि प्रहरीले जनाएको छ ।

Categorized in अपराध