ललितपुरको कुपण्डोलमा भएको मोटरसाइकल दुर्घटनामा एक पुरुषको मृत्यु भएको छ ।

मंगलबार राती भएको दुर्घटनामा मोटरसाइकलमा सवार गोदावरी नगरपालिका–९ छम्पी बस्ने ३१ वर्षीय राजु तामाङको मृत्यु भएको हो ।

बा.९५ प ५३३४ नम्बरको गुड्दै गरेको मोटरसाइकल अनियन्त्रित भई विद्युतको पोलमा ठोक्किँदा दुर्घटना भएको थियो । दुर्घटनामा गम्भीर घाइते भएका तामाङको उपचारको क्रममा पाटन अस्पतालमा मृत्यु भएको हो ।

सोही दुर्घटनामा घाइते भएका मोटरसाइकल चालक गोदावरी नगरपालिका–७ बुरुमचुलीका ३६ वर्षीय दिपेश तामाङलाई सोही अस्पतालमा उपचार गरिँदैछ ।

Categorized in समाज