रियल म्याड्रिडले स्पेनिस सुपर कपमा फाइनलमा प्रवेश गरेको छ । बुधबार रियलले आफ्नो शहरी प्रतिद्धन्दी एट्लेटिको म्याड्रिडमाथि ५–३ को जित निकालेको हो ।

साउदी अरबमा भएको खेलको निर्धारित ९० औं मिनेटको समय ३–३ गोलको बराबरीमा सकिएपछि खेल अतिरिक्त समयमा गएको थियो । अतिरिक्त समयमा दुई गोल गर्दै रियल प्रतियोगिताको फाइनल पुगेको हो ।

खेलमा अग्रता एट्लेटिकोले मारियो हर्मोसाको गोलमा लिएको थियो । एन्टोनी रुडिगरले हेडमार्फतनै खेल बराबरीमा ल्याएका थिए । फेरलेन्ड मेन्डीले रियललाई पुन खेलमा अग्रता दिलाएका थिए ।

पहिलो हाफ सकिन तीन मिनेटअघि एन्टोनी ग्रिजम्यानले कीर्तिमानी गोल गर्दै खेललाई बराबरीमा ल्याए । ग्रिजम्यानले एट्लेटिकोका लागि कीर्तिमानी १ सय ७४ गोल गरेका छन् ।

दोस्रो हाफमा रियलका रुडिगरको आत्मघाति गोलमा एट्लेटिकोले खेलमा ३–२को अग्रता लिएको थियो ।

खेल सकिन ५ मिनेटअघि कार्भाजलले गोल गर्दै खेलमा अतिरिक्त समयमा धकेलेका थिए ।

अतिरिक्त समयमा स्टिफन सेविकको आत्मघाति गोल र ब्राहिम डियाजले गोल गर्दै रियल फाइनल पुगेको हो ।

रियलले उपाधिका लागि बार्सिलोना वा ओसासुनासँग खेल्नेछ ।

आज हुने दोस्रो सेमिफाइनलमा बार्सिलोना र ओसासुना खेल्दैछन् । 

Categorized in स्पाेर्ट्स