२०७२ सालको महाभूकम्पले पूर्णरुपमा क्षतिग्रस्त काठमाडौँ महानगरपालिकाको वडा २२ वटु टोलमा अवस्थित नासःद्यः (नाट्यश्वर) को द्यःछेँ (देवता घर) पुनर्निर्माणका लागि पनि काठमाडौँ महानगरपालिकाले आर्थिक सहयोग गर्ने प्रतिवद्धता व्यक्त गरेको छ । 

नासःद्यः द्यःछेँ पुनर्निर्माणका लागि केही दिन अघि गरिएको क्षमापुजा कार्यक्रममा काठमाडौँ महानगरपालिकाका प्रमुख विद्यासुन्दर शाक्य र उपप्रमुख हरिप्रभा खड्गी (श्रेष्ठ) दुबै जना उपस्थित हुनुभएको थियो । 

क्षमापुजामा सहभागी काठमाडौँ महानगरपालिकाकी उपप्रमुख हरिप्रभा खड्गी (श्रेष्ठ) ले काठमाडौँ महानगरपालिकामा जनप्रतिनिधि निर्वाचित भएर आएपछि कला, संस्कृति र सम्पदाको संरक्षण र संर्वद्धनमा निकै महत्वपूर्ण भूमिका खेल्दै आएको बताइन् । 

‘काठमाडौँ महानगरपालिकामा जनप्रतिनिधि निर्वाचित भएर आएपछि यहाँका  कला, संस्कृति र सम्पदा  संरक्षणका लागि निकै ठूलो भूमिका खेल्दै आएका छौँ,’ खड्गीले भनिन्, ‘काठमाडौँ महानगरपालिकाका प्रमुख, म आफैँ, वडाध्यक्ष र प्रत्येक वडाका जनप्रतिनिधि पनि सम्पदा संरक्षणको अभियानमा अहोरात्र खटिरहेका छौँ ।’ 

उपप्रमुख खड्गीले काठमाडौं महानगरभित्र थुप्रै सम्पदा पुनर्निर्माणका काम सूचारु रहेको जानकारी दिनुभयो । 

क्षमापुजा कार्यक्रममा काठमाडौँ महानगरपालिकाका प्रमुख शाक्य र उपप्रमुख खड्गीको साथै संघीय सांसद कृष्णगोपाल श्रेष्ठ, प्रदेश सांसद डाक्टर अजयक्रान्ति शाक्य, २२ वडाका अध्यक्ष चिनकाजी महर्जन, गुठीका सदस्यलगायतको उपस्थिति थियो । 

 

एक करोड २५ लाखमा पुर्ननिर्माण हुँदै वटुको नासःद्यः द्यःछेँ

भूकम्पले द्यःछेँ पूर्णरुपमा क्षति भएपछि वटु नाट्यश्वर गुठीले कामचलाउ रुपमा पुर्ननिर्माण गरी पूजा–आजा गर्दै आएका थिए । 

क्षतिग्रस्त अवस्थाको मन्दिरलाई पुर्ननिर्माण गर्न त्यहाँ रहेका सामान सार्नुपर्ने र द्यःछेँ समेत भत्काउनु पर्ने भएकाले त्यसका लागि क्षमापूजा गर्नुपर्ने परम्परा अनुसार उक्त पूजा गरी पुर्ननिर्माणको काम अघि बढाएको वटु गुठीका अध्यक्ष शान्तराज महर्जनले जानकारी दिनुभयो ।

पुरात्वात्विक तथा अभिलेखको संरक्षण गर्ने काम नाट्यश्वर गुठीले गर्दै आएको छ । 

‘काठमाडौँ महानगरपालिकाका प्रमुख शाक्यज्युले गुठीले संरक्षण गरिरहेको गुठीघरमा रहेका पुरात्वात्विक महत्वका र अभिलेखको संरक्षण गर्न हामीलाई आग्रह गर्नुभएको छ’, गुठीका अध्यक्ष महर्जनले भन्नुभयो ।

निर्माण कार्यको सम्पूर्ण खर्च महानगरपालिकाले व्यहोर्ने प्रतिवद्धता व्यक्त गरेको पनि महर्जनले जानकारी दिनुभयो । 

‘साउनको दोस्रो हप्ताबाट मन्दिर पुर्ननिर्माणको काम अघि बढ्छ,’ महर्जनले भन्नुभयो, ‘निर्माणपछि त्यहाँ बत्ती, धारा र पुरात्वात्विक महत्वलाई झल्काउने खर्च गुठीले व्यहोर्ने भन्ने छ ।’ 

आगामी आर्थिक वर्षको असोज मसान्तसम्ममा द्यःछेँ पुर्ननिर्माण सम्पन्न गर्ने लक्ष्य लिइएको छ । नासःद्यः पुर्ननिर्माणका लागि करीब १ करोड २५ लाख लाग्ने अनुमान गरिएको छ ।

Categorized in स्थानीय