आज (मंगलबार) ललितपुर महानगरपालिका वडा नं.१९ स्थित मछिन्द्र बहालको चहल पहल नै बेग्लै छ ।

यहाँ आज वडाध्यक्ष राजेन्द्र महर्जन, वडा सदस्यहरु, ललितपुर महानगर प्रहरी, नेपाल प्रहरी सबै मिलेर बहालको सरसफाई गरीयो । बहाललाई चिटिक्क बनाइयो ।

हेर्दैमा आकर्षक, शान्त यो बहाल सरसफाई पछि झन राम्रो देखिँदैछ ।

रातो मच्छिन्द्रनाथ वर्षको ६ महिना यो बहालमा विराजमान हुन्छन् ।

६ महिना बुंगमतिमा र ६ महिना यो बहालस्थित मन्दिरमा रातो मच्छिन्द्रनाथलाई विराजमान गराउने परम्परा रहँदै आएको छ । यसै परम्पराको निरन्तरताको क्रममा भोलिबाटको ६ महिना रातो मच्छिन्द्रनाथ यसै मच्छिन्द्र बहालमा विराजमान हुनुहुनेछ ।

भोलि रातो मच्छिन्द्रनाथलाई यहाँ ल्याइने भएकोले नै आज सरसफाई गरिएको हो ।

सरसफाइ कार्यक्रममा टोल सुधार समितिका पदाधिकारी र सदस्यहरु, महिला समुहका पदाधिकारी र सदस्यहरु, लमपा १९ वडाका वडाध्यक्ष साथै सदस्यहरु, नगर प्रहरी, नेपाल प्रहरी र सरसफाइ कर्मीहरु मिलेर बहालको सरसफाई गरिएको थियो ।

लमपाकी उप प्रमुख मञ्जली शाक्य बज्राचार्यले भक्तजनहरुलाई दर्शनको सहज होस् भनेर सरसफाइ कार्यक्रमको आयोजना गरिएको बताइन् ।

‘यस्ता बहाल, चोकहरु हाम्रै सम्पदा हो । यसको सरसफाई, संरक्षणमा हामी सधैं सक्रिय छौं नै । भोलिबाट रातो मच्छिन्द्रनाथ यहाँ ल्याइने भएकोले आज विशेष सरसफाई गरिएको हो’ उपप्रमुख शाक्य बज्राचार्यले भनिन् ।

लमपा वडा नं.१९ का वडा अध्यक्ष राजेन्द्र महर्जनले मच्छिन्द्रबहाल वडाकै गर्व भएकोले यसको संरक्षणमा आफुले सक्दो प्रयास गरी नै रहने बताए । 

Categorized in स्थानीय