पाकिस्तानी क्रिकेट टिमका १० जना खेलाडीलाई मंगलबार कोरोना भाइरस (कोभिढ १९) संक्रमण पुष्टि भएको छ ।

पाकिस्तान क्रिकेट बोर्डले सोमबार ३५ जनालाई कराँची, लाहोर र पेसावरमा कोरोना संक्रमणको परीक्षण गराएको थियो । 

परिक्षण अनुसार पहिलो चरणको नतिजामा सादब खान, हैदर अली, र हरिस राउफ गरि ३ जना क्रिकेटरलाई कोरोना संक्रमण देखिएको थियो ।

त्यस्तै, दोस्रो चरणको नतिजामा मोहमद हफिज, फखर जमान, मोहमद रिजवान, वाहेब रियाज, मोहमद हस्नइन र इमरान खान गरि थप ७ जना खेलाडीलाई पनि संक्रमण देखियो ।

एक जना अफिसियल स्टाफलाई पनि कोभिड १९ संक्रमण भएको छ ।

तर ३५ मध्ये २५ खेलाडीमा भने संक्रमण देखिएको छैन । 

कोभिड १९ संक्रमण लागेका दशैजना खेलाडीहरु अब आइसोलेसनमा बस्नेछन् ।

पाकिस्तानी क्रिकेट टिम अगस्टमा हुने तीन वटा टेस्ट र तीन टी(२० खेल्नका लागि आउँदो साता इंग्ल्यान्ड जाँदैछ । यहि जुन २८ मा लाहोरबाट म्यानचेस्टरका लागि टीम प्रस्थान गर्ने कार्यक्रम रहेको छ ।

भ्रमणअघि गरिएको परीक्षणमा पाकिस्तानका महत्वपूर्ण खेलाडीहरुमा कोभिड १९ संक्रमण देखिएपछि टिममाथि चुनौती थपिएको छ ।

संक्रमण देखिएका खेलाडीहरु अब इंग्ल्यान्ड जान पाउने छैनन् । उनीहरु १४ दिन आइसोलेसनमा बसेपछि नेगेटिभ नतिजा आए मात्र इंग्ल्यान्ड जान पाइनेछ ।

तर यसअघि मोहमद अमिर र हरिस सोहिलले इंग्ल्यान्ड भ्रमण नगर्ने जनाएका थिए ।

Categorized in स्पाेर्ट्स