नेपालमा कोरोनाभाइरसबाट संक्रमित हुनेको संख्या सय नाघेको छ । आज कपिलवस्तुमा दुई युवाको परिक्षणमा कोरोना संक्रमण पोजेटिभ देखिएपछि नेपालमा संक्रमितको संख्या १ सय १ पुगेको छ ।

आज कपिलवस्तुमा १६ वर्ष र २२ वर्ष उमेरका युवाहरुमा कोरोनाभाइरसको संक्रमण पुष्टि भएको हो । 

राष्ट्रिय जनस्वास्थ्य प्रयोगशाला टेकुमा बिहीबार भएको परीक्षणमा उनीहरुमा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । 

उनीहरू दुबैको स्वास्थ्य अवस्था सामान्य रहेको र स्वास्थ्यकर्मीको सम्पर्कमा रहेको मन्त्रालयले जनाएको छ ।

कपिलवस्तुमा पहिलो पटक कोरोना संक्रमित भेटिएका हुन् । यसअघि कपिलवस्तुको छिमेकी जिल्ला रुपन्देहीमा एक जनामा कोरोना संक्रमण पुष्टि भएको थियो ।

नेपालमा अहिलेसम्म २२ जनालाई यो रोग निको भइसकेको छ भने तीमध्ये तीन जनामा पुनः संक्रमण देखिएपछि अस्पताल भर्ना गरिएको छ ।

काठमाडौंका ५८ वर्षीय पुरुषमा पुनः संक्रमण देखिएपछि पाटन अस्पताल भर्ना गरिएको छ भने रौतहटका १९ वर्षीय पुरुष र पर्साका ४४ वर्षीय पुरुषमा पनि पुनः संक्रमण देखिएपछि नारायणी अस्पताल वीरगंजमा भर्ना गरिएको छ ।

Categorized in राष्ट्रिय