सरकारले डिजिटल लाइसेन्सको सुरुवात गरेको छ ।

आइतबार औपचारिक कार्यक्रम गरी बागमती प्रदेशमा नागरिक एपबाट डिजिटल लाइसेन्स वितरण गर्न लागिएको बागमती प्रदेशको श्रम, रोजगार तथा यातायात मन्त्रालयले जनाएको छ ।

सो सेवाबाट चालकले सवारीचालक अनुमतिपत्र (लाइसेन्स) को ट्रायल पास गरेपछि मोबाइलमै लाइसेन्स आउने भएको छ ।

नौ वर्षदेखि माग अनुसार कार्ड छपाइ हुन नसकेर वर्षौं कुर्नुपर्ने समस्या भएपछि सरकारले तत्कालका लागि आइतबारदेखि नागरिक एपमार्फत मोबाइलमै डिजिटल लाइसेन्स पठाउने भएको हो ।

प्रधानमन्त्री केपी शर्मा ओलीले पनि शनिबार आफ्नो फेसबुकमार्फत अब लाइसेन्स कार्ड आवश्यक नपर्ने व्यवस्था गरिएको बताउनुभएको छ । लाइसेन्स छपाइ नहुँदा परेको समस्याको अन्त्य भएको चर्चा गर्दै उहाँले कुनै पनि कामका लागि लाइन बस्नुपर्ने समस्याबाट मुक्त गर्ने तयारीमा लागेको बताएका छन् ।

यसका साथै काठमाडौँ उपत्यका ट्राफिक प्रहरी कार्यालयले आजदेखि डिजिटल चिटको शुभारम्भ गर्ने भएको छ । अब उप्रान्त ट्राफिक नियम उल्लंघन गरेमा डिजिटल चिट दिने भएको छ ।

यसबाट चिट काटेपछि भुक्तानीका लािग अरु प्रक्रियामा जानुपर्ने झन्झटबाट मुक्त हुने कार्यालयले जनाएको छ । सो चिटको जरिवाना सोही स्थानमा अनलाइनमार्पmत भुक्तानी गर्न सकिने व्यवस्था पनि गरिएको छ ।

नागरिक एपमा रहने चालक अनुमतिपत्रमा ‘क्यूआर कोड’ देखाउने व्यवस्था गरिएको छ । ट्राफिक प्रहरीले ‘इ चलान डिजिटल’ एपमार्फत सडक नियम उल्लङ्घन गर्ने चालकको मोबाइलमा देखिने ‘क्यूआर कोड’ ‘स्क्यान’ गरेर कारबाहीको विवरण प्रविष्ट गर्नेछन् ।

लगत्तै नागरिक एपमा ट्राफिक नियम उल्लङ्घन कोलममा कसूर र जरिवाना रकमसहितको ‘डिजिटल चिट’ को विवरण र जरिवाना भुक्तानी गर्ने माध्यम देखाउने व्यवस्था छ ।

यसबाट चालकले तत्कालै ‘डिजिटल वालेट’ मार्फत जरिवाना रकम भुक्तानी गर्न सक्ने भएका छन् । हाललाई यो सेवा काठमाण्डौ, भक्तपुर र ललितपुरमा मात्र उपलब्ध हुनेछ ।

Categorized in राष्ट्रिय