देशभर गएको अविरल वर्षापछिको बाढीपहिरोका कारण धादिङको झ्याप्लेखोलामा पुरिएको बसमा ३५ जनाएको मृत्यु भएको जनाइएको छ ।

पृथ्वी राजमार्गअन्तर्गत धादिङको झ्याप्लेखोलामा ३ वटा गाडी पुरिँदा अहिलेसम्म ३५ जनाको मृत्यु भएको प्रहरीले जनाएको छ । जसमा पहिरोमा परेर स्याङ्जाको गल्याङ नगरपालिका–३ का सीता भट्टराईसहित उहाँका जुम्ल्याहा छोरा दीपेश र छोरी दीपिका पुरिएका हुन्।

बङ्गलादेशमा हुने नेसनल एस्ट्रोनोमी ओलम्पियार २०२४ मा भाग लिन बङ्गलादेश जानका लागि उनीहरू काठमाडौँ हिँडेका थिए।

सशस्त्र प्रहरी बल, नेपालका अनुसार शनिबार बुटवलबाट काठमाडौँका लागि छुटेको लु १ ज ४५७८ नम्बरको माइक्रो (विंगर) धादिङको झ्याप्लेखोलामा आएको पहिरोमा पुरिँदा त्यसमा सवार चालकसहित १४ जनाको मृत्यु भएको प्रहरीले जनाएको छ।

पहिरोमा अर्काे एउटा बस र दुइटा माइक्रोबस पुरिएको अवस्थामा भेटिएका हुन् । चितवनबाट काठमाडौंका लागि आएको माइक्रोबस पनि आज पुरिएको अवस्थामा भेटिएको छ ।

उक्त माइक्रो बसबाट १३ जनाको शव निकालिएको प्रहरीले जनाएको छ । सशस्त्र प्रहरी बल, नेपालका सह–प्रवक्ता डीएसपी शैलेन्द्र थापाका अनुसार चितवनबाट काठमाडौं आउँदै गरेको बा ३ ज १३४५ नम्बरको माइक्रो बस पहिरोमा पुरिएको हो ।

डीएसपी थापाका अनुसार उक्त माइक्रो बसबाट ४ महिला र ९ पुरुषको शव निकालिएको छ । पहिरोमा अन्य गाडीहरू पनि पुरिएको आशंकामा खोजी कार्य जारी रहेको छ ।

त्यही पहिरोमा गोरखाबाट काठमाडौं आउँदै गरेको ना ४ ख २२७० नम्बरको यात्रुवाहक बस पनि पुरिएको अवस्थामा फेला परेको छ । उक्त बसबाट ८ जनाको शव निकालिएको छ ।

त्यसैगरी बुटवलबाट काठमाडौं आइरहेको लु १ ज ४५७८ नम्बरको माइक्रोबस पहिरोमा पुरिँदा १४ जनाको मृत्यु भएको छ ।

माइक्रोबसबाट आठ पुरुष, पाँच महिला र एक बच्चाको शव निकालिएको प्रहरीले जनाएको छ । अविरल वर्षापछि आएको बाढी, पहिरो र डुुबानबाट अहिलेसम्म देशभर १ सय ३२ जनाको मृत्युको पुष्टि भएको छ ।

गृहमन्त्रालयका अनुसार काठमाडौँ उपत्यकामा ६८, बागमती प्रदेशमा ४५, कोशी प्रदेशमा १७ र मधेशमा २ जनाको मृत्यु भएको हो ।

यस्तै, विपदमा परी हालसम्म ६८ जना बेपत्ता भएका छन् भने एकसय जना घाइते भएका छन् ।

Categorized in राष्ट्रिय