विहीबार रातीदेखि परिरहेको अविरल वर्षाका कारण उपत्यकाका तीन जिल्लामा मात्र ३४ जनाको मृत्यु भएको छ ।

उपत्यका प्रहरी कार्यालय, रानीपोखरीकाका अनुसार नौ महिनाकी गर्भवतीसहित ललितपुरमा १८, काठमाडौँमा ११ र भक्तपुरमा पाँच जनाको मृत्युभएको पुष्टि गरेको छ ।

मृत्युहरुको अहिलेसम्म २७ जनाको सनाखत भएको छ भने सात जनाको सनाखत हुन बाँकी रहेको प्रहरीले जनाएको छ । काठमाडौँ उपत्यका प्रहरी कार्यालयका प्रहरी वरिष्ठ उपरीक्षक विनोद घिमिरेका अनुसार विपद्का घटनामा परी १७ जना बेपत्ता भएका छन् भने १७ जना घाइते भएका छन् ।

बाढीपहिरो तथा डुबानमा परेका एक हजार तीन सय १५ जनाको उद्धार गरिएको उहाँले बताउनुभयो । बाढीपहिरोबाट काठमाडौँमा चार घर भत्केका छन् भने भक्तपुरमा एउटा घरमा क्षति पुगेको छ ।

काठमाडौँमा एक हजार तीन सय २४, ललितपुरमा पाँच सय र भक्तपुरमा चार सय १७ गरी उपत्यकामा दुई हजार दुई सय ४१ घर डुबानमा परेका छन् ।

विपद्का घटनाको उद्धार र राहत कार्यमा काठमाडौँमा तीन हजार ६०, ललितपुरमा एक हजार एक सय र भक्तपुरमा तीन सय ५० प्रहरी खटिइएको प्रहरी वरिष्ठ उपरीक्षक घिमिरेले जानकारी दिनुभयो ।

यता नखिपोटमा उद्दारमा ढिलाइ हुँदा शनिबार बिहान ४ जना बेपत्ता भएका थिए । तर, केही तल तीन जनालाई प्रहरी र स्थानीय मिलेर उद्दार गरेका हुन् । भक्तपुरमा पनि अधिकांश स्थानमा पानी पसेको छ ।

भक्तपुरमा प्रहरी उपरीक्षकको कमाण्डमा १२० जना प्रहरी परिचालित भएको प्रहरीले जनाएको छ । पछिल्लो २४ घण्टामा देशका अधिकांश स्थानमा वर्षा भएको छ । जल तथा मौसम विभागको बाढी पूर्वानुमान महाशाखाका अनुसार देशका ९८ स्थानमा धेरै वर्षा भएको छ ।

जसअनुसार पाल्पाको कुमाल गाउँ स्टेसनमा पछिल्लो २४ घण्टामा २ सय १६ मिलिमिटर वर्षा मापन भएको छ । यस्तै तनहुँको विमलनगर स्टेसनमा २ सय ५३ मिलिमिटर वर्षा रेकर्ड भएको छ ।

मौसम पूर्वानुमान महाशाखाले ५० मिलिमिटरभन्दा माथि भए भारी वर्षा, १ सय मिलिमिटरमाथिको वर्षालाई धेरै भारी वर्षा र २ सय मिलिमिटरमाथिको वर्षालाई अति धेरै भारी वर्षाको सूचीमा राख्ने गरेको छ ।

मनसुनी प्रणाली कायमै रहेका बेला बंगालको खाडीबाट आएको जलवाष्पयुक्त वायुसमेत थपिएपछि नेपालमा गत ३६ घण्टादेखि लगातार वर्षा भइरहेको छ ।

अझै ३६ घण्टा वर्षा हुने सम्भावना रहेको मौसमविदले बताएका छन् । यसैगरी काठमाडौं उपत्यकामा बागमती नदीको खोकना मापन केन्द्र र बाराको पसाहा खोलाको महेशपुर मापन केन्द्रले बाढीले सतह खतराको संकेतसम्म पुगेको देखाएको छ ।

Categorized in राष्ट्रिय