विहीबार दिउँसोदेखि आइतबारसम्म देशभर भारी वर्षा हुने जल तथा मौसम पूर्वानुमान महाशाखाले प्रक्षेपण गरेको छ ।

देशका ५६ वटै जिल्लामा मध्यमदेखि भारी वर्षा हुने जल तथा मौसम विभाग अन्तर्गतको मौसम पूर्वानुमान महाशाखले विशेष बुलेटिन जारी गर्दै बताएको हो ।

बंगालको खाडी र अरब सागरबाट उठेको उच्च जलवाष्पयुक्त वायु नेपालतर्फ आईरहेकोले मध्यमदेखि भारी वर्षाको संभावना रहेको विभागको अनुमान छ ।

आज विहीबार दिनभर साधारणतया मौसम बदली रहने र दिउँसोबाट अधिकांश स्थानमा मेघ गर्जन/चट्याङसहित हल्कादेखि मध्यम तथा भारी वर्षा हुने जनाएको छ ।

कोशी, बागमती, गण्डकी र लुम्बिनी प्रदेशका धेरै स्थान तथा मधेस, कर्णाली र सुदूरपश्चिम प्रदेशका केही स्थानमा भारी भारी वर्षाको सम्भावना रहेको महाशाखाको बुलेटिनमा उल्लेख छ ।

गण्डकी र लुम्बिनी प्रदेशका केही स्थान तथा कोशी, बागमती, मधेस, कर्णाली र सुदूरपश्चिम प्रदेशका एक–दुई स्थानमा अति भारी वर्षाको चेतावनी पनि महाशाखाले दिएको छ ।

आगामी शनिबार देशभर हल्कादेखि मध्यम वर्षाको सम्भावना रहेको भन्दै महाशाखाले उक्त दिन बागमती, गण्डकी, लुम्बिनी तथा कर्णाली प्रदेशका केही स्थान र बाँकी प्रदेशका थोरै स्थानमा अति भारी वर्षाको सम्भावना रहेको जनाएको छ ।

साथै लुम्बिनी, गण्डकी र कर्णाली प्रदेशका केही स्थानमा हावाहुरीको समेत सम्भावना रहेको भन्दै महाशाखाले लगातारको वर्षाका कारण भू–क्षय, बाढी, पहिरो तथा गेग्रान बहावको जोखिम रहेको पनि जनाएको छ ।

तराइका जिल्लाहरुमा डुबान हुनसक्ने भन्दै उच्च सतर्कताका लागि अनुरोध पनि गरिएको छ ।

Categorized in राष्ट्रिय