भक्तपुरको गठ्ठाघरमा ना ६ ख २१७३ नम्बरको कौशलटारबाट गठ्ठाघरतर्फ गइरहेको ट्रकले बा ३९ प ८९४४ नम्बरको स्कुटरलाई ठक्कर दिँदा स्कुटरमा सवार एक महिलाको घटनास्थलमै मृत्यु भएको छ ।

बिहीबार दिउँसो १ः४० बजे उक्त घटना घटेको हो । प्रत्यक्षदर्शीहरुका अनुसार ट्राफिक चेकिङका क्रममा रोकिराखेको स्कुटरलाई ट्रकले हानेपछि सो घटना घटेको हो ।

ठक्कर दिएपछि ट्रकका चालक भने फरार भएका थिए । तीव्र गतिको ट्रकले करिब एक सय परसम्म स्कुटरलाई घिसारेको प्रत्यक्षदर्शीले बताएका छन् । चालकको शरीर क्षतविक्षत भएको प्रहरीले जनाएको छ ।

घटनास्थलमा झोला र किताब–कापी भेटिएका छन् । घटनापछि आक्रोशित स्थानीयले ट्रकमा तोडफोड गर्नुका साथै गठ्ठाघर मूल सडक अवरुद्ध पारेर प्रदर्शन गरेका थिए ।

स्थिति नियन्त्रणमा लिन प्रहरीले अश्रुग्यास हानेको थियो । घटनाको तीन घण्टापछि प्रहरीले शव निकालेर पोष्टमार्टमका लागि त्रिवि शिक्षण अस्पताल महाराजगञ्जमा पठाएको छ ।

दुर्घटनापछि स्थिति तनावग्रस्त बनेपछि जिल्ला प्रहरी परिसर भक्तपुर र काठमाडौंका टोली र सशस्त्र प्रहरी बलको टोली समेत परिचालन गरिएको थियो ।

करिब दुई हजारको हाराहारीमा जम्मा भएको भीडले गठ्ठाघर चोकको ट्राफिक आइल्याण्ड समेत तोडफोड गरेको थियो ।

यता प्रहरीले उत्पन्न तनावलाई नियन्त्रणमा लिन अश्रुग्यास समेत प्रहार गर्नुपरेको थियो । बिहीबार साँझ अबेर मात्र गठ्ठाघर क्षेत्र सामान्य बनेको जिल्ला प्रहरी परिसरले बताएका छन् ।

प्रदर्शनकारीहरुका अनुसार दुर्घटना हुनुको मुख्य कारण सडकमा जथाभावी गाडी रोकेर चेकजाँच गर्दा दुर्घटना भएको भन्दै प्रहरीविरुद्ध आक्रोश पोखेका थिए ।

तर, प्रहरीले भने त्यस क्षेत्रमा बिहीबार ट्राफिक प्रहरीले गाडी रोकेर चेकजाँच नगरेको दाबी गरेको छ ।

यता दुर्घटना गराउने ट्रक चालकलाई प्रहरीले पक्राउ गरेको छ । ना.६ ख २१७३ नम्बरको भाडाको ट्रकका चालक सर्लाहीको मलंगवा घर भएका ३२ वर्षीय सतेन्द्र श्रेष्ठलाई पक्राउ गरिएको जिल्ला प्रहरी परिसर भक्तपुरका डीएसपी राजन कार्कीले बताए ।

Categorized in राष्ट्रिय