सरकारले सुनको भन्सार दर घटाएपछि आज सुनको मूल्य ह्वात्तै घटेको छ ।

सरकारले सुनमा भन्सार दर २० प्रतिशतबाट १० प्रतिशतमा झारेको छ भने चाँदीमा पनि १५ प्रतिशतबाट १० प्रतिशतमा झारेको छ । भन्सार दर घटेपछि सुनको मुल्य आज एकैदिन १५ हजार नौ सय रुपैयाँले घटेको छ ।

हिजो एक लाख ६७ हजार दुई सय रुपैयाँमा भएको सुन आज एकैदिन १५ हजार नौ सय रुपैयाँले घटेर एक लाख ५१ हजार तीन सय रुपैयाँ कायम भएको नेपाल सुनचााँदी व्यवसायी महासङ्घले जनाएको छ ।

यस अघि कात्तिक १५ गते एक लाख ७१ हजार रुपैयाँ सम्म पुगेको सुनको भाउ कात्तिक अन्तिममा लगातर घटेर एक लाख ६० हजार रुपैयाँसम्म झरेको थियो ।

यस्तै आज चाँदीको भाउ पनि तोलामा एक सय १५ रुपैयाँले घटेर एक हजार आठ सय ४५ रुपैयाँमा पुगेको छ । मङ्सिर लागेपछि निरन्तर बढेको सुनचाँदीको भाउ सरकारले आयातमा लाग्ने भन्सार महसुल घटाएसँगै आज एकैदिन ठूलो अङ्कले घटेको हो ।

भारतमा सुनको भन्सार महसुल थोरै रहेका कारण नेपालमा चोरी तस्करी बढ्ने आशङ्काबीच भन्सार महसुल घटाइएको हो ।

Categorized in बिजनेस