काठमाडौंस्थित त्रिभुवन अन्तर्राष्ट्रिय विमानस्थल आजदेखि दैनिक १० घण्टा बन्द हुने भएको छ ।

विमानस्थलको स्तरोन्नतिका लागि आजबाट पाँच महिनासम्म दैनिक १० घण्टा उडान बन्द गर्नुपरेको नेपाल नागरिक उड्डयन प्राधिकरणले बताएको छ ।

विमानस्थालका अनुसार कात्तिक २३ देखि चैत्र १८ गतेसम्म राती १० बजेदेखि विहान ८ बजेसम्म विमानस्थल बन्द हुने जनाइएको छ ।

गर्मी मौसममा काम गर्न असहज हुने र वर्षा पनि हुने भएकोले विमानस्थलको स्तोरोन्नतिको काम अगाडि बढाइएको प्राधिकरण महानिर्देशक प्रदीप अधिकारीं जानकारी दिनुभएको छ ।

विमानस्थलको दक्षिण–पश्चिमतर्फ समानान्तर ‘ट्याक्सीवे’, उत्तरतर्फको ‘इन्टरनेशनल एप्रोन’ र विमानस्थलको पूर्वतर्फको ‘ह्याङ्गर एप्रोन’लगायत विस्तार गर्नेछ ।

त्रिभूवन विमानस्थल बन्द गरी गौतमबुद्ध र पोखरा विमानस्थल चलायो भन्ने आरोपको प्राधिकरणले खण्डन गरेको छ ।

विमानस्थलको स्तरोन्नतिपछि २० देखि २५ प्रतिशत धावनमार्गको क्षमता वृद्धि गरी विमानस्थलको एयर ट्राफिक व्यवस्थापन गर्ने प्राधिकरणको लक्ष्य छ ।

त्रिभूवन अन्तर्राष्ट्रिय विमानस्थल मर्मतको लागि १० घण्टासम्म बन्द हुने भएसँगै विमानस्थलको विकल्प गौतमबुद्ध र पोखरा अन्तर्राष्ट्रिय विमानस्थल बन्नेछन् ।

प्राधिकरणले पनि राष्ट्रिय तथा अन्तर्राष्ट्रिय वायुसेवा कम्पनीहरुलाई अन्तर्राष्ट्रिय उडान गौतमबुद्ध र पोखरा अन्तर्राष्ट्रिय विमानस्थलबाट गर्न आग्रह गरेको छ ।

तीन अन्तर्राष्ट्रिय वायुसेवा कम्पनीको उडान तालिका स्वीकृत गरेको अधिकारीले जानकारी दिनुभयो ।

Categorized in राष्ट्रिय