युरोपको शीर्ष पाँच लिग मध्ये एक इटालियन सिरी–ए, आगामी १३ जुनबाट सुचारु गर्ने तयारी शुरु भएको छ । 

भिडियो कन्फरेन्स मार्फत लिग समितिको बुधबार बसेको बैठकले १३ जुनको नयाँ मिति तय गरेको हो ।

इटालीको सरकारले स्वीकृति नदिएसम्म भने लिग शुरु गर्न पाइनेछैन ।

सरकारले लिग सुचारु गर्न स्वीकृति दिए १३ जुनबाट सिरी–ए सुचारु गर्ने योजनामा लिग समिति जुटेको हो ।

लिगको जनरल एसेम्बलिले सरकारको निर्णय र मेडिकल प्रोटोकल अनुसार लिग फेरि सुरु गर्ने मिति बारे निर्णय गरेको बीबीसीले जनाएको छ ।

मेडिकल प्रोटोकल अनुसार कुनै टिमको एक खेलाडी वा स्टाफ मात्रैमा कोभिड–१९ पोजिटिभ देखिए पूरै टिम नै दुई साता क्वारेन्टाइनमा बस्नुपर्ने छ ।

लिगमा आबद्ध सम्पूर्ण क्लबहरुले सरकारले तोकेका सम्पूर्ण नियमहरु पालना गर्ने प्रतिबद्धता व्यक्त गरेका छन् । 

इटालियन सि.री.ए को शीर्ष डिभिजनका क्लबहरु मे महिनादेखि ट्रेनिङमा फर्किएका छन् । यसअघि खेलाडीले व्यक्तिगत रुपमा मे ४ देखि प्रशिक्षण सुरु गरेका थिए । 

टिमले मे १८ देखि प्रशिक्षण गर्न पाउँदैछन् ।

सि.रि.एका खेलहरु गत मार्च ९ देखि रोकिएका थिए । लिगमा अझै १२ राउन्डका खेल बाँकी छन् । 

शीर्ष स्थानको युभेन्ट्सले दोस्रो स्थानको लाजियोसँग १ अंकको अग्रता लिएको अवस्थामा लिग स्थगित भएको थियो ।

कोरोनाभाइरस महामारीका कारण विश्वभरका बहुचर्चित लिगहरु स्थगित गरिएका थिए ।

कोभिड–१९ कै कारण फ्रेन्च लिग–वान रद्द भइसकेको छ । 

यस्तै इंग्ल्याण्डको प्रिमियर लिग जुन १ पछि सुरु गर्ने तयारी भइरहेको छ भने स्पेनिस ला लिगा पनि जुनको दोस्रो साताबाट सुरु गर्ने तयारी भइरहेको छ ।

Categorized in स्पाेर्ट्स