नेपालमा बालबालिकाको सङ्ख्या ९८ लाख ६९ हजार पाँच सय ८३ रहेको राष्ट्रिय तथ्याङ्क कार्यालयले जनाएको छ ।

राष्ट्रिय तथ्याङ्क कार्यालयले राष्ट्रिय जनगणना २०७८ को बालबालिकासम्बन्धी तथ्याङ्कीय प्रतिवेदन आज सार्वजनिक गरेको छ ।

राष्ट्रिय जनगणना २०७८ को कुल जनसङ्ख्या दुई करोड ९१ लाख ६४ हजार पाँच सय ७८ जनामध्ये बालक ५१ लाख १४ हजार पाँच सय पाँच र बालिका ४७ लाख ५५ हजार ७८ रहेको तथ्याङ्कमा उल्लेख छ ।

यो जन्मदेखि १८ वर्षसम्मको उमेर हो । यसमा बालकभन्दा बालिकाको सङ्ख्या तीन लाख ५९ हजार चार सय २७ ले कम छ । सो तथ्यांक अनुसार नेपालमा पछिल्लो लैङ्गिक अनुपात खतराउन्मुख देखिएको छ ।

यसले भोलिका दिनमा लैङ्गिक अनुपात बिग्रने र विवाहका लागि जोडी नपाउनेदेखि प्राकृतिक नियम नै प्रभावित हुनसक्ने जानकारहरु बताउँछन् ।

जनगणना भएको एक वर्षको अवधिमा लैङ्गिक अनुपातः ११२ रहेको छ । अर्थातः हरेक १०० बालिकाको जन्म हुँदा ११२ जना बालक जन्मिएका छन् ।

राष्ट्रिय जनगणना २०७८ को तथ्यांक अनुसार नेपालमा समग्र रुपमा जन्मदर नै कम हुन थालेको देखाइएको छ ।

२०५८ देखि २०६८ सालसम्मको तुलनामा २०६८ देखि २०७८ सालसम्ममा झन्डै १२ लाखको सङ्ख्यामा कम बालबालिका जन्मेका छन् ।

समग्र जनसंख्यामा भने पुरुषको तुलनामा महिला धेरै छ । तर बालबालिकाको मात्र प्रवृत्ति अध्ययन गर्दा बालिकाको तुलनामा बालक धेरै छन् ।

Categorized in राष्ट्रिय