new zenith_admission
arin enterprises

नास्टले बनायो विद्युतीय स्कुटर

SamacharDesk | २०७८ चैत्र २४, बिहिबार

नेपाल विज्ञान तथा प्रविधि प्रतिष्ठान (नाष्ट)ले विद्युतीय स्कुटरको निर्माण गरेको छ । सो स्कुटर एक पटक चार्ज गर्दा ५० किलोमिटर गुड्ने नास्टले जनाएको छ । 

नेपालको माटो र बाटो सुहाउँदो मोडल बनाएको दाबी गर्दै प्रतिष्ठानले व्यावसायिक रुपमा कारखाना नै स्थापना गरेर स्कुटर उत्पादन गर्न चाहनेलाई मार्ग प्रशस्त गरिएको छ । 

अन्तर्राष्ट्रिय बजारमा एक पटक चार्ज गर्दा एक हजार किलोमिटर गुड्ने विद्युतीय सवारीसाधन उपलब्ध भइसकेको छ । विद्युतीय सवारी साधनको निर्माणमा चीन र भारत दुवै देशले ठूलो प्रगति गरिसकेका छन् ।

नेपालका सडकमा पनि विभिन्न मोडलका विद्युतीय सवारीसाधन गुडन थालिसकेका छन् । 

पेट्रोलियम पदार्थको दिनानुदिन मूल्यवृद्धिबाट आजित उपभोक्ताहरु अब विद्युतीय साधनतर्फ लम्किरहेको अवस्थामा यसको निर्माणले उपभोक्ताहरुलाई सहज हुने प्रतिष्ठानले जनाएको छ । प्रतिष्ठानले हाल प्रोटोटाइप (नमूना) निर्माण गरेको हो ।

यस्तै प्रतिष्ठानले नेपालमा नै कारखाना स्थापना गरेर काम गर्दा के कस्तो प्राविधिक तथा आर्थिक तयारी गर्नुपर्छ भन्नेबारेमा समेत सम्भाव्यता अध्ययन गरिरहेको छ । सो कार्यका लागि लुम्बिनी प्रदेश सरकारले सहकार्य गरिरहेको छ ।

प्रतिष्ठानको परिसरमा नै विद्युतीय स्कुटरको प्रयोगशाला निर्माण गरिएको छ । हाल बनाइएको स्कुटरको नाम ‘सारथी’ राख्ने बारेमा तयारी भइरहेको जनाएको छ । 

एउटा स्कुटर बनाउन प्रतिष्ठानले रु तीन लाखभन्दा बढी खर्च गरेको छ । ठूलो मात्रामा उत्पादन गर्ने अवस्था आउँदा नेपालभित्रै न्यूनतम रु एक लाख ५० हजारदेखि रु दुई लाखसम्ममा विद्युतीय स्कुटर बनाउन सकिन्छ । सबै सामान विदेशबाट आयात गर्नुपर्ने भएकाले केही महँगो भने हुन जाने प्रतिष्ठानको बुझाइ छ ।

प्रतिष्ठानले हाल तयार पारेको स्कुटरमा दुई किलोवाट क्षमताको लिथियम आयन ब्याट्री राखिएको छ ।

हाल तयार भएको स्कुटर एक पटक चार्ज गर्दा ५० किलोमिटर गुड्न सक्छ । ब्याट्री र मोटरको क्षमता बढाउँदै जाँदा थप किलोमिटर गुडाउन सकिन्छ । 

Categorized in विज्ञान-प्रविधी
SKIP THIS Maharjan Complex