मृगौलाको डायोलाइसिस लगायतका स्वास्थ्य सेवा पुर्याउँदै आएको पूल्चोकस्थित आरोग्य स्वास्थ्य प्रतिष्ठानका एक कर्मचारीमा कोरोना भाइरस (कोभिड १९) संक्रमण पुष्टि भएपछि सो फाउन्डेसनको साथै निदान अस्पताल क्षेत्र समेत सिल गरिएको छ ।

आरोग्य प्रतिष्ठानको भवन र निदान अस्पताल एउटै प्राङ्गणमा रहेको हुनाले फाउन्डेसनको साथै निदानमा पनि सिल गरिएको हो ।

मंगलबार संक्रमण पुष्टि हुने ८३ जनामध्ये मध्यपुर थिमि निवासी २५ वर्षकी महिला आरोग्यको लेखा शाखामा कार्यरत एकाउन्टेन्ट भएको बताइएको छ ।

श्रोतले बताए अनुसार महिला बैशाख २९ गते सुन्सरीबाट एक सहयोगीसँगै मोटरसाइकलमा सिधै उपत्यका भित्रिने नाकामा आएकि थिइन् ।

नाकामा उनलाई प्रतिष्ठानकै एक जना कर्मचारीले मोटरसाइकलबाट पुल्चोकस्थित प्रतिष्ठानमा ल्याएको र त्यहाँबाट मध्यपुर थिमिस्थित साथीको डेरामा गएको श्रोतले जानकारी दिएको छ ।

यसैबीच, निदान अस्पतालले भने विज्ञप्ती जारी गरी महिलाले अस्पताल प्राङ्गणमा प्रवेश नै नगरेको दावी गरेको छ ।

पिसिआर परिक्षणको रिपोर्ट पोजेटिभ आएपछि उनी बस्ने स्थान मध्यपुर थिमिबाट टेकु अस्पताल पुर्याउन आरोग्य प्रतिष्ठानको गाडी प्रयोग भएको र ड्राइभरको साथमा एकजना कर्मचारी उनको सम्पर्कमा आएको विज्ञप्तीमा उल्लेख छ ।

ती कर्मचारी र ड्राइभर पनि हाल आइसोलेसनमा बसेको निदानले जनाएको छ ।

निदानले संक्रमित महिला अस्पताल प्राङ्गणमा प्रवेश नै नगरेको बताइरहँदा उक्त क्षेत्र किन सिल गरियो भन्ने प्रश्न भने उब्जिएको छ ।

केही संचारमाध्यमले संक्रमित महिला निदानमा कार्यरत स्टाफ नर्स भनी सम्प्रेषण गरेको समाचारको खण्डन गर्दै सो कुरामा सत्यता नभएको पनि निदानले प्रष्ट पारेको छ ।

 

मध्यपुर थिमिस्थित शंखधर चोकस्थित क्षेत्र पनि सिल

महिलामा संक्रमण पुष्टि भएसँगै मध्यपुर थिमी नगरपालिका–४ स्थित शंखधर चोक र वरपरको क्षेत्र पनि सिल गरिएको छ । 

महिला सो क्षेत्रमा साथीको डेरामा बस्दै आएकि थिइन् ।

सिल गरिएको क्षेत्रमा यातायात बन्द गरिएको छ । प्रहरीले सबैजसो सडकमा डोरी टाँगी र बार लगाई बन्द गराएको छ ।

महिलाको कन्ट्याक्ट ट्रेसिङ शुरु भइसकेको स्वास्थ्य तथा जनसंख्या मन्त्रालयले जनाएको छ ।

Categorized in समाज