नेपालको पहिलो गीति चलचित्र ‘गौंथली’ लगायत एक जमानामा एकसे एक हिट फिल्म दिएका निर्माता, गायक तथा गीतकार डा. भोला रिजाल दुई दशकपछि पुनः अर्को एउटा फिल्म लिएर आउँदैछन् ।

डा. रिजाल ‘ह्यारीकि प्यारी’ नामक रोमान्टीक कमेडी फिल्मबाट पूनः फिल्म निर्माणको क्षेत्रमा फर्किएका हुन् ।

डा. रिजालको बिआर प्रडक्सनको व्यानरमा निर्माण हुन लागेको चलचित्रको पर्वतको भुक देउरालीमा मुहुर्त गरी सुटिङ शुरु गरिएको छ । सुटिङ शुरु गर्नुअघि चर्चित हास्य कलाकार जितु नेपाल र विजय बरालले मुहुर्त सट दिएका थिए ।

चलचित्रको निर्देशन ख्यातिप्राप्त स्त्री रोग विशेषज्ञ डा. भोला रिजालका दन्त चिकित्सक पुत्र डा. कपिल रिजालले गर्दैछन् ।

लण्डनको दन्त चिकित्सा क्षेत्रमा अढाई दशकदेखि लोकप्रियता कमाउँदै आएका डा. कपिलले लण्डनमै बसेर अंग्रेजी भाषाका सर्ट फिल्महरु गिल्ट, साइलेन्स र कर्मा बनाइसकेका छन् ।

साथमा उनले नेपाल र लण्डनमा गरी एक दर्जन म्युजिक भिडियोहरु पनि निर्देशन गरिसकेका छन् । फिचर फिल्म भने यो उनको पहिलो फिल्म हुने भएको छ ।

निर्देशक डा. रिजालका अनुसार पर्वतका विभिन्न स्थानमा दुई सातासम्म फिल्मको सुटिङ हुनेछ भने बाँकी सुटिङ काठमाडौंमा गरिनेछ ।

युनिट पर्वत प्रस्थान गर्नु अघि युनिटमा सहभागी सबै कलाकार तथा प्राविधिकको पिसिआर परिक्षण गरिएको र खोप लगाएका कलाकार र प्राविधिकलाई मात्र युनिटमा सहभागी गराइएको जानकारी रिजालले दिए ।

पर्वत पुगेर पनि र्‍यापिड टेष्ट गरी स्वास्थ्य मापदण्ड अपनाएर सुटिङ अघि बढाइएको उनको भनाई छ ।

फिल्ममा जितु ह्यारी र साम्राज्ञी राज्य लक्ष्मी शाह उनको प्यारीका रुपमा देखिनेछन् ।साथमा विजय बराल, लक्ष्मी गिरी, सुभास गजुरेल, नरेश पौडेल, रञ्जना भट्टराई, समिक्षा पौडेल, रमेश अधिकारी, डिल्लीराम खनाललगायतका कलाकारले यसमा अभिनय गर्दैछन् ।

फिल्ममा कथा पनि डा. कपिलकै रहेको छ भने पटकथा र संवाद सुदीप बराल, गिरीराज घिमिरे, डा. कपिल रिजाल र अभिमन्यू निरवीले लेखेका छन् ।

त्यस्तै गीत डा. भोला रिजाल, संगीत शिखर सन्तोष र युग भुषाल, गायन सपनकुमार राई, सौभर दास, थोम्सन एन्ड्रयुज, मीना निरौला र देवाञ्जली जोशी, कोरियाग्राफी कविराज गहतराज, छायांकन निर्देशन सुदीप बराल र सम्पादन अर्जुन जिसीको रहनेछ ।

Categorized in पेजथ्री