पर्सामा थप २१ जना कोरोनाबाट निको भए
SamacharDesk – विकाश | २०७७ जेठ १४, बुधबार
पर्सामा थप २१ जना कोभिड–१९ संक्रमित उपचारपछि निको भएर घर फर्केका छन् ।
गण्डक अस्पतालमा उपचाररत २१ संक्रमित निको भएर अस्पतालबाट डिस्चार्ज भएका हुन् । उनीहरुलाई मंगलबार राति नै डिस्चार्ज गरिएको छ ।
अस्पतालबाट डिस्चार्ज हुनेहरु सबैलाई विदाइ गर्न वीरगन्ज महानगरपालिकाका मेयर विजयकुमार सरावगी समेत पुगेका थिए । मेयर सरावगी र स्वास्थ्यकर्मीहरुले उनीहरुलाई फूल दिएर विदाई गरे ।
पछिल्लो दुईवटा परिक्षणको रिपोर्ट लगातार दुई नेगेटिभ आएपछि उनीहरुलाई डिस्चार्ज गरिएको हो । डिस्चार्ज हुनेमा १५ महिनादेखि ७४ वर्ष उमेरसम्मका ४ महिला र १७ जना पुरुषहरु छन् ।
डिस्चार्ज हुने सबै वीरगन्ज महानगरपालिकाका बासिन्दा हुन् । उनीहरु गत वैशाख २७ देखि ३० गतेसम्म भर्ना भएका थिए ।
योसँगै नेपालमा कोरोना निको हुनेको संख्या एक सय ७६ पुगेको छ ।
गण्डक अस्पतालमा अब ९ जना संक्रमित उपचाररत छन् ।
यसअघि नारायणी अस्पतालमा भर्ना ७२ जना कोरोना संक्रमित निको भएर घर फर्किसकेका छन् । आइतबार १८ जना र सोमबार ४३ जना डिस्चार्ज भएका थिए ।
पर्सामा कोरोना संक्रमितको उपचारको लागि एक सय २८ बेड क्षमताको आइसोलेसन वार्ड रहेको छ ।
७० शैय्या क्षमताको नारायणी अस्पताल अहिले खाली छ । गण्डक कोरोना विशेष अस्पतालमा ५० र पोखरिया नगरपालिकामा ८ बेडको आइसोलेसन छ ।
Categorized in समाज
