सरकारले आगामी आर्थिक वर्ष २०८१/८२ को वार्षिक नीति तथा कार्यक्रम सार्वजनिक गरेको छ ।

संघीय संसद्का दुवै सदनको संयुक्त बैठकलाई सम्बोधन गर्दै राष्ट्रपति रामचन्द्र पौडेलले आज सरकारको नीति तथा कार्यक्रम प्रस्तुत गर्नुभएको हो । नीति तथा कार्यक्रम मार्फत सरकारले जनतामा आसा र भरोसा जागृत भएको दाबी गरेको छ ।

संविधान कार्यान्वयन, संघीयताको सवलीकरण, अर्थतन्त्रको सुधार र भ्रष्टाचार नियन्त्रण सरकारको मुख्य प्राथमिकता रहेको दाबी नीति तथा कार्यक्रममा गरिएको छ । राष्ट्रपति पौडेलले वर्तमान सरकार देशमा समाजवाद उन्मुख आर्थिक, सामाजिक रुपान्तरणका लागि राजनीतिक स्थायित्व, सुशासन, विकास र सामाजिक न्यायसहित समृद्ध नेपालः सुखी नेपालीको राष्ट्रिय दायित्व पूरा गर्न प्रतिवद्ध रहेको बताउनुभयो ।

आज प्रस्तुत नीति तथा कार्यक्रममा  मेलम्ची खानेपानी आयोजनाबाट १२ महिना खानेपानी आपूर्ति हुने व्यवस्था मिलाई काठमाडौँ उपत्यकाको चक्रपथ बाहिर र भक्तपुर जिल्लाको अरनिको राजमार्गसँग जोडिएका क्षेत्रमा क्रमशः खानेपानी आपूर्ति गरिने बताउनुभयो।

उहाँले काठमाडौँ उपत्यकाको खानेपानी समस्याको दिगो समाधान गर्न शिवपुरी राष्ट्रिय निकुञ्ज लगायत जलाधार क्षेत्रमा रहेका स्रोतबाट पानी सङ्कलन गरी वितरण गर्ने प्रवर्द्धन मिलाइने पनि बताउनुभयो। सरकारले शिक्षकहरूले दलको सदस्य बन्न नपाउने कानुनी व्यवस्था कडाइका साथ कार्यान्वयन गर्ने प्रतिवद्धता पनि जनाएको छ ।

सरकारी, सामुदायिक तथा निजी शिक्षालयका शिक्षक वा कर्मचारीले राजनीतिक दलको सदस्य बन्न नपाउने कानुनी व्यवस्थाको पूर्ण कार्यान्वयन गरिने घोषणा नीति तथा कार्यक्रममा गरिएको छ ।

यस्तै सरकारले पाँच लाख भूमिहिनलाई जग्गा प्रदान गर्ने घोषणा समेत नीति तथा कार्यक्रम मार्फत गरेको छ । आगामी आर्थिक वर्षभित्र थप १५ हजार ५ सय हेक्टर खेतीयोग्य जमिनमा सिंचाई पु¥याउने तथा राजमार्ग आसपासका क्षेत्रमा फलफूल खेती गर्ने दाबी पनि सरकारले गरेको छ ।

गरिबीको रेखामुनि रहेका परिवारको पहिचान गरी उनीहरुलाई विद्युतीय चुलो र ट्युबवेल लगायत सामग्री उपलब्ध गराउने नीति पनि अघि सारेको छ ।

त्यसैगरी महिलालाई आत्मनिर्भर बनाउन प्रधानमन्त्री छोरी आत्मनिर्भर कार्यक्रम संचालन गर्ने कार्यक्रम पनि सरकारले अघि सारेको छ ।

सरकारले दैलेखमा शुरु गरिएको पेट्रोलियम पदार्थको अन्वेषणलाई आगामी आर्थिक वर्षभित्र पुरा गर्ने प्रतिवद्धता पनि जनाएको छ । त्यस्तै सरकारले युवा कृषक तथा उद्यमीसँगको साझेदारीमा वडास्तरमा नमूना फार्म स्थापना गरी सिकाइ केन्द्रको विकास गर्ने जनाएको छ ।

त्यसैगरी सरकारले माटोको उर्वराशक्तिको दिगो व्यवस्थापन गर्न गुणस्तरीय रासायनिक मलको आपूर्ति सुनिश्चित गर्नुका साथै मलखादको आयात, गुणस्तर अनुगमन, माटोको अम्लीयपना घटाउन र उत्पादन वृद्धि गर्न प्राङ्गारिक खेतीलाई प्रोत्साहित गरिने भएको छ ।

नीति तथा कार्यक्रममा  नारायणी र सुनकोशी नदीमा जल यातायात संचालन गर्ने कार्यक्रम अघि सार्दै सरकारले ती दुवै नदीमा जल यातायात टर्मिनल बनाउने घोषणा पनि गरेको छ ।

मध्यपहाडी लोकमार्गलाई समृद्धि मार्गको रुपमा विकास गर्ने कार्यक्रम पनि सरकारले ल्याएको छ । पहाडमा टाकुरा पर्यटन कार्यक्रम पनि ल्याइएको छ भने घरजग्गा कारोबार सम्बन्धि कानुन पनि संशोधन गर्ने भएको छ ।

Categorized in राष्ट्रिय