अविरल वर्षाको कारण देशका विभिन्न स्थानमा आएको बाढी, पहिरो लगायतका विपद्मा परी बिहीबार दिउँसोसम्म मृत्यु हुनेकाे संख्या १३४ पुगेको छ ।

नेपाल प्रहरीले सार्वजनिक गरेकाे तथ्याङ्क अनुसार गत जेठ २८ गतेदेखि श्रावण १० बिहिबार दिउँसोसम्ममा बाढी, पहिरो लगायतका विपदमा परी १३४ जनाको मृत्यु भएको हो ।

जसमध्ये काठमाडौं उपत्यकामा २ जना, कोशी प्रदेशमा २२ जना, मधेश प्रदेशमा ६, बागमती प्रदेशमा २५, गण्डकी प्रदेशमा ३८, लुम्बिनी प्रदेशमा २३, कर्णाली प्रदेशमा ८ र सुदूरपश्चिम प्रदेशमा १० जना छन् ।

यसै अवधिभरीमा प्राकृतिक विपद्मा परी घाइते हुनेको संख्या १४८ जना रहेका छन् ।

जसमा काठमाडौं उपत्यकामा ९ जना, कोशी प्रदेशमा ३४, मधेश प्रदेशमा ९, बागमती प्रदेशमा ९, गण्डकी प्रदेशमा २९, लुम्बिनी प्रदेशमा ९, कर्णाली प्रदेशमा ३५ जना र सुदूरपश्चिम प्रदेशमा १४ जना छन् ।

घाइतेहरूलाई स्थानीय अस्पतालहरुमा उपचार गरिँदैछ ।

त्यसैगरी काठमाडौं उपत्यकामा ३ जना, कोशी प्रदेशमा ४९, गण्डकी प्रदेशमा १२, कर्णाली प्रदेशमा २ र सुदूरपश्चिम प्रदेशमा ५ जना गरी जम्मा ७१ जनाको उद्धार गरिएको छ ।

बाढी पहिरोमा परी अझै सात जना बेपत्ता रहेका छन् । कोशी प्रदेशमा २ जना, बागमती प्रदेशमा २ जना, गण्डकी प्रदेशमा १ जना, लुम्बिनी प्रदेशमा १ जना र कर्णाली प्रदेशमा १ जना जना गरी ७ जना वेपत्ता छन् ।

वेपत्ताको खोजी कार्य जारी रहेको प्रहरीले जनाएको छ ।

बाढीको कारण जम्मा १८४ घर डुबानमा परेका छन् । २ सय ३७ वटा घर, ८६ वटा गोठ, ४३ वटा पुल, २ वटा विद्यालय र २ वटा सरकारी कार्यालयमा क्षति पुगेको छ । ६०३ वटा पशु चौपायाको मृत्यु भएको छ ।

उक्त अवधिमा विपद्का घटनाबाट ४ हजार ३० घर परिवार विस्थापित भएका छन् ।

विभिन्न निकाय र स्थानीयबासीको सहयोगमा बाढी पहिरोको जोखिममा रहेका विभिन्न जिल्लाका विभिन्न घर परिवारलाई सुरक्षित स्थानमा राख्ने, पहिरोमा पुरिएका धनमाल निकालेर सुरक्षा गर्ने काम समेत गरीरहेको नेपाल प्रहरीले जनाएको छ ।

विभिन्न स्थानमा भएको बाटो अवरोध हटाउने कार्य समेत निरन्तर भइरहेको प्रहरीको भनाई छ ।

Categorized in राष्ट्रिय