राष्ट्रिय परीक्षा बोर्डले २५ वर्षअघि कक्षा ११ र १२ पढाइ गरेर अनुत्तिर्ण विद्यार्थीहरुका लागि मौका परीक्षाको अवसर ल्याएको छ ।

बोर्डका अनुसार कक्षा ११ र १२ प्रारम्भ भएको वर्ष २०५६ सालयता परीक्षामा सहभागी भएर अनुत्तीर्ण विद्यार्थीका लागि मौका परीक्षाको व्यवस्था गरिएको छ ।

मौका परीक्षामा सहभागी हुन इच्छुकहरुलाई २०८१ मंसिर २७ गतेसम्म सम्बन्धित विद्यालयमार्फत परीक्षा फाराम भर्न राष्ट्रिय परीक्षा बोर्डले भनेको छ । विगतका परीक्षामा सहभागी भएर उत्तीर्ण हुन नसकेका वा तोकिएको ग्रेड प्राप्त गर्न नसकेका सबैखाले विद्यार्थी मौका परीक्षामा सहभागी हुन सक्नेछन् ।

बोर्डको यो व्यवस्था अनुसार कक्षा १२ संचालन भएको वर्षदेखि २०७७ सालसम्मका अनुत्तीर्ण विद्यार्थीहरुले मौका परीक्षामा सहभागी हुन पाउने छन् । कक्षा १२ कालागि रजिष्ट्रेसन नम्बरको सुरुका दुई अंक ५६ वा सोभन्दा बढी र ७७ वा सोभन्दा कम भएकाले मौका परीक्षाको फारम भर्न पाउँछन् ।

यसैगरी कक्षा ११ का लागि रजिष्ट्रेसन नम्बरको सुरुका दुई अंक ५६ वा सोभन्दा बढी र ७६ वा सोभन्दा कम भएकाहरुले अन्तिम एक पटकका लागि मौका परीक्षा दिन पाउँछन् ।

जति विषयमा फेल भएका विद्यार्थीले पनि मौका परीक्षामा सहभागी हुन पाउने बोर्डले जनाएको छ । आवेदन फारम भर्ने विद्यार्थीको संख्याका आधारमा परीक्षा केन्द्र र तालिका पछि सार्वजनिक हुनेछ ।

बोर्डले यस्तो मौका परीक्षामा सहभागी हुनेको संख्या १४ लाखको हाराहारीमा हुनसक्ने अनुमान गरेको छ । 

Categorized in राष्ट्रिय