चलचित्र पत्रकार संघमा यसपटक अध्यक्ष र महासचिव पदमा रोचक प्रतिस्पर्धा हुने देखिएको छ ।

चलचित्र विधामा कार्यरत पत्रकारहरूको छाता संगठन चलचित्र पत्रकार संघ नेपालको दशौं महाधिवेशन आगामी वैशाख ५ गतेको लागि तय भएको छ ।

संघमा महाधिवेशन लागेसँगै विभिन्न पदमा चलचित्र पत्रकारहरूले उम्मेदवारी घोषणा गर्न थालेका छन् भने अध्यक्ष र महासचिव पदमा आकांक्षी धेरै देखिएका छन् ।

अध्यक्ष पदमा पत्रकार राजन घिमिरेले उम्मेदवारी घोषणा गरिसकेका छन् । सोही पदमा वर्तमान अध्यक्ष समीर बलामी पनि आकांक्षी देखिएका छन् भने यसै पदमा पूर्व उपाध्यक्ष विष्णु सुवेदी र हालका सचिव नवीन गिरीको नाम पनि चर्चामा छ ।

यहि पदमा पूर्व अध्यक्ष सन्दिप सापकोटाले चासो राखेको पनि चर्चा छ । यद्यपि हालसम्म, राजनबाहेक अरुले अध्यक्षमा औपचारिक रुपमा उम्मेदवारी घोषणा गरिसकेका छैनन् ।

यसैगरी, महासचिव पदमा मनिष कार्की, गोपीकृष्ण चापागाईं, पवन भट्टराई र सिपी जैसीबीच प्रतिस्पर्धा हुने देखिएको छ । यो पदमा पवनबाहेक अरुले उम्मेदवारी घोषणा गरिसकेका छन् ।

सचिव पदमा मदन रिजाल र सुरेन्द्र थापाले प्रतिस्पर्धा गर्ने भएका छन् भने समावेशी सचिवमा महम्मद जलिम उठ्दैछन् । अहिलेसम्मको अवस्था हेर्दा यस पदमा महम्मद निर्विरोध हुने देखिन्छ ।

उपाध्यक्ष पदमा भने कुमार आचार्यले उम्मेदवारी घोषणा गरेका छन् । संगठन उपाध्यक्षमा हालका महासचिव रघुनाथ सापकोटा उठ्ने पक्का भएको छ । अहिलेसम्म यी दुवै पदमा अरुको उम्मेदवारी आएको छैन ।

महिला उपाध्यक्ष पदमा सुष्माश्री कार्की र विना श्रेष्ठको नाम चर्चामा छ । तर, उनीहरू दुवैले पनिउम्मेदवारी घोषणा गरिसकेका छैनन् ।

कोषाध्यक्ष पदमा अन्जान दाहाल (मनिष)ले उम्मेदवारी घोषणा गरेका छन् । यही पदमा निशा बजगाईंको नाम पनि चर्चामा छ । सह–कोषाध्यक्ष पदमा प्रणव सुवेदीले उम्मेदवारी घोषणा गरेका छन् ।

एक समावेशीसहित ८ जना सदस्यमा भने अहिलेसम्म रतन बहादुर चन्द, यूवर्ण पौडेल (पूजा), दीपराज महतारा, नवीन चापागाईं र सालिकराम न्यौपानेले उम्मेदवारी घोषणा गरेका छन् ।

Categorized in पेजथ्री