कोरोना भाइरसको महामारीको कारण स्थगित जारी सिजनको च्याम्पियन्स लिगका खेलहरु सुचारु गर्नका लागि युइएफएले मिति र स्थान तय गरेको छ ।

यूरोपको फुटबलको सर्वोच्च निकाय युइएफएले युरोपियन च्याम्पियन्स लिगका अन्तिम ८ का खेलहरु गर्नका लागि १२ देखि २३ अगस्टसम्मकोे मिति तोकेको छ । 

त्यसअघि अन्तिम १६ का बाँकी खेलहरु अगस्ट ७ र ८ मा हुनेछ ।

त्यस्तै लिगका बाँकी खेलसहित फाइनल प्रतिस्पर्धा पोर्चुगलको लिस्बन सहरमा हुने भएको छ । 

प्रतियोगितामा म्यानचेस्टर सिटी विरुद्ध रियाल मेड्रिड, चेल्सी विरुद्ध बायर्न म्युनिख, युभेन्टस विरुद्ध लियोन र बार्सिलोना विरुद्ध नापोली गरि अन्तिम १६ का चार खेल बाँकी छन् । 

यसअघि चार टोली आरबी लेइप्जिग, एथ्लेटिको मेड्रिड, पिएसजी र एट्लान्टा भने अर्को चरणमा पुगिसकेका छन् । 

यसपटक युइएफएले अन्तिम आठदेखि होम एन्ड अवे गरी दुई खेल नखेलाई एउटा मात्रै नकआउट म्याच खेलाउने निर्णय गरेको छ ।

यी खेलहरु पोर्चुगलका चार वटा रंगशालामा बिना दर्शक खेलाइने छ ।

कोरोना महामारीका कारण स्थगित हुनुअघि लिगको सेमिफाइनल र फाइनल टर्कीको स्तानबुल सहरमा हुने भनिएको थियो । 

महामारी पछि इस्तानबुल शहरलाई प्रतियोगिता आयोजना गर्न अप्ठ्यारो भएकोले समझदारीमा प्रतियोगिताको स्थान नै सार्ने निर्णय गरिएको हो ।

अब इस्तानबुलले सन् २०२१ को फाइनल आयोजना गर्नेछ ।

त्यस्तै महिला च्याम्पियन्स लिग २१ देखि ३० अगस्टसम्म स्पेनमा हुनेछ भने युरोपा लिग ७ अगस्टदेखि जर्मनीमा हुनेछ ।

Categorized in स्पाेर्ट्स