कोप–२९मा हिमालदेखि समुद्रसम्मका विषयलाई उठाउँछु : प्रधानमन्त्री ओली
SamacharDesk | २०८१ कार्तिक १०, शनिबार
प्रधानमन्त्री केपी शर्मा ओलीले जलवायुजन्य मुद्दाको नेतृत्व नेपालले गर्नुपर्ने बताउनुभएको छ ।
वन तथा वातावरण मन्त्रालयले आज शनिबार काठमाडौँमा आयोजना गरेको जलवायु राष्ट्रिय सम्मेलनलाई सम्बोधन गर्नुहुँदै प्रधानमन्त्री ओलीले सो कुरा बताउनुभएको हो ।
प्रधानमन्त्री ओलीले आगामी महिना अजरबैजानको बाकुमा हुने जलवायुसम्बन्धी विश्व सम्मेलन (कोप–२९) हिमालदेखि समुद्रसम्मका विषयलाई सशक्त रुपमा उठाइने पनि बताउनुभयो ।
प्रधानमन्त्री ओलीले मधेश प्रदेशमा जलवायु परिवर्तनको ठुलो असर परेको महसुस गरेको बताउनुभयो । जलवायु परिवर्तनको असर न्यूनीकरणका लागि वृक्षारोपणको अभियान सुरु गरेको र सङ्घ सरकारले पनि सहयोग गर्ने प्रतिबद्धता जनाउनुभयो ।
जलवायु परिवर्तनका कारण महिला, बालबालिका र ज्येष्ठ नागरिक सबैभन्दा बढी पीडित भएको बताउनुभयो ।
कार्यक्रममा सर्वोच्च अदालतकी न्यायाधीश सपना मल्ल प्रधानले अदालतले जलवायु परिवर्तन लगायतका वातारणीय संकटबाट बच्नका लागि उचित क्षतिपूर्तिसहितको व्यवस्था गर्नुपर्ने कुरालाई स्पष्ट पारेको बताउनुभयो ।
जलवायु परिवर्तनका कारण नेपालले ठूलो जनधनको क्षति व्यहोर्नुपरेकाले त्यसबाट बच्नका लागि अदालतले जलवायु परिवर्तन र वातावरणीय न्यायको कुरामा केन्द्रित हुनुपर्ने कुरालाई स्पष्ट रुपमा उल्लेख गरेको बताउनुभयो ।
Categorized in राष्ट्रिय
