पशुपति क्षेत्र विकास कोषको स्वामित्वमा रहेको पशुपति गौशाला धर्मशाला खाली गराउने काम रोक्न निर्देशन दिएको छ ।

संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले शान्ति सुरक्षामा समस्या उत्पन्न भएको भन्दै पशुपति क्षेत्र विकास कोषलाई पत्राचार गरी धर्मशाला खालीगराउने काम तत्काल रोक्न निर्देशन दिएको छ ।

पशुपति क्षेत्र विकास कोषका अध्यक्ष समेत रहनुभएका मन्त्री पाण्डेले कोषको निर्णयअनुसार धर्मशालाको व्यवस्थापन जिम्मेवारी काठमाडौँ महानगरपालिकालाई दिने ७ बुँदे समझदारी भएपनि उक्त कार्य रोक्न निर्देशन दिएको हो ।

यसअघि बुधबार पशुपति क्षेत्र विकास कोषको स्वामित्वमा रहेको पशुपति गौशाला धर्मशाला खाली गराउन गएको काठमाडौँ महानगरपालिकाको प्रहरी टोली फिर्ता भएको छ । 

पशुपति क्षेत्र विकास कोषको नौ रोपनी नौ आना दुई पैसा जग्गा कब्जा गरेर मारवाडी सेवा समितिले निर्माण गरेका अवैध संरचना हटाउन र पशुपति गौशाला धर्मशाला खाली गराउन पुगेको नगर प्रहरी ‘प्रहरी प्रशासन’ कै असहयोगले बुधबार फिर्ता भएको हो ।

काठमाडौँ महानगरपालिका वडा नं। ८ का अध्यक्ष आशामान सङ्गतले पशुपति गौशाला धर्मशाला खाली गराउन दुई वटा डोजरसहित पुगेको महानगर प्रहरीलाई नेपाल प्रहरी र प्रशासनिक निकायबाट असहयोग भएको बताउनुभयो ।

नेपाल प्रहरीको टोलीले महानगर प्रहरीलाई धर्मशालाभित्र प्रवेश गर्ने क्रममा मूल गेटमै रोकेको थियो । पशुपति क्षेत्र विकास कोष र काठमाडौँ महानगरपालिकाबिच असोज २२ गते पशुपति गौशाला धर्मशाला सञ्चालन र व्यवस्थापन गर्ने सन्दर्भमा सातबुँदे सहमति भएपछि महानगरले धर्मशाला खाली गराउने तयारी थालेको हो ।

पशुपति क्षेत्र विकास कोष र मारवाडी सेवा समितिबिच २०६० मा भएको सम्झौता अनुसार वार्षिक ५१ हजार रुपियाँ ‘सहयोग’ बुझाउने समितिले होटल, लज, रेस्टुरेन्ट, डायलासिस सेन्टर र जर्सी गाई पालेर दुध ब्यापार गर्दै आएको छ ।

साथै समितिले धर्मशालाका १९ वटा सटर भाडामा लगाएर प्रतिसटर मासिक ३५ हजार रुपियाँभन्दा बढी असुल्ने गरेको छ ।

Categorized in राष्ट्रिय