प्रधानमन्त्री केपी शर्मा ओलीले नेपाल–चीन सम्बन्ध अझ प्रगाढ भएको बताउनुभएको छ।

चारदिने भ्रमण पूरा गरी आज स्वदेश फर्किनु भएका प्रधानमन्त्री ओलीले चीन भ्रमण ऐतिहासिक बनेको दाबी गर्नुभयो । नेपाल र चीनबीच बेल्ट एण्ड रोड इनिसिएटिभ (बिआरआई) सहकार्यको फ्रेमवर्कमा सम्झौता भएको छ।

बेइजिङमा भएको सम्झौतामा नेपालका तर्फबाट परराष्ट्र मन्त्रालयका सचिव अमृतबहादुर राई र चीनका तर्फबाट नेशनल डेभलपमेन्ट एण्ड रिफर्म कमिसनका उपाध्यक्ष लि सुशेले हस्ताक्षर गर्नुभएको थियो।

बीआरआई फ्रेमवर्कमा सहमति हुनु ऐतिहासिक उपलब्धि भएको भन्दै उहाँले बीआरआई अन्तर्गत ऋण लिने कुरा नभएको जिकीर गर्नुभयो । ऋण लिने कुरै भएको छैन भन्दै उहाँले ऋण लिने भयो भनेर सारङ्गी बजाउनुको अर्थ छैन भन्नुभयो ।

प्रधानमन्त्री केपी ओलीले र उहाँका चिनियाँ समकक्षी लि छ्याङको उपस्थितिमा नेपाल र चीनबीच विभिन्न समझदारी भएको थियो। उक्त समझदारीमा दुवै देशका प्रधानमन्त्रीबीच द्विपक्षीय वार्तापछि पारस्परिक सहयोगसम्बन्धी सम्झौतामा हस्ताक्षर भएको हो।

यस्तै नारायणगढ – बुटवल सडकखण्डको काम अबको केही समयभित्र पुनः शुरु हुने र २०८३ भित्र पुरा हुने बताउनुभयो ।

गत सोमबार ८७ सदस्यीय टोलीको नेतृत्व गर्दै चीन जानुभएका ओलीले चीनमा रहँदा त्यहाँका राष्ट्रपति सी चिनफिङ, प्रधानमन्त्री ली छ्याङसंग दुई पक्षीय भेटवार्ता गर्नुभएको थियो ।

दुई पक्षीय वार्तामा नेपाल र चीनबीच नौ बुँदे विकास कार्यक्रममा सहमति भएको थियो । यस्तै हिजो नेपाल र चीनबीच बीआरआई फ्रेमवर्कमा सहमति भएको थियो ।

बीआरआई अन्तर्गत एड एसिस्ट्यान्स फाइनान्सिङको मोडलमा काम हुने भनिए पनि त्यसको ब्याख्या भने भएको छैन ।

Categorized in राष्ट्रिय