जलन पीडितहरुले पनि एक लाख दिने मन्त्री पौडेलेको उद्घोष
SamacharDesk | २०८१ भाद्र २८, शुक्रबार
स्वास्थ्य तथा जनसङ्ख्यामन्त्री प्रदीप पौडेलले जलन उपचारका लागि एक लाख आर्थिक सहयोग उपलब्ध गराउने घोषणा गर्नुभएको छ ।
शुक्रबार वीर अस्पतालमा स्थापना गरिएको डा. केडी जोशी जलन उपचार केन्द्रको शुभारम्भ गर्दै उहाँले जलन उपचारका लागि तत्काल लागू हुने गरी एक लाख रुपैयाँ सहयोग उपलब्ध गराउने बताउनु भएको हो ।
सरकारले क्यान्सर, किड्नीलगायतका प्राणघातक रोगका विरामीको उपचारमा पनि प्रति विरामी एक लाख रुपैयाँ उपलब्ध गराउँदै आएको छ ।
अब जलनका विरामीका पनि त्यो व्यवस्था तत्काल गर्ने मन्त्री पौडेलको प्रतिवद्धता थियो । मन्त्री पौडेलले उपचारको अभावमा जलन पीडितहरुको ज्यान जाने गरेकाले सरकारले त्यस्ता पीडितहरुको उपचारका लागि सो केन्द्र स्थापना गरेको बताउनुभयो ।
मन्त्री पौडेलले आम नागरिकले जलन उपचारका निम्ति सुविधा पाउने एउटा स्थिति वीर अस्पतालमा बनेको बताउनुभयो ।उहाँले जलन उपचार नपाएर जीवनभर शारीरिक अपाङ्ग हुनुपर्ने थुप्रै व्यक्तिहरु भएको तथा आज संचालन भएको यस सेवाले थप सहयोग मिल्ने बताउनुभयो ।
त्यस अवसरमा वीर अस्पतालका निर्देशक डा। सन्तोष पौडेलले भूकम्पपछि सो सेवा बन्द भए पनि नेपाल सरकारले प्राथमिकता दिएपछि सो सेवा पुनः सञ्चालनमा ल्याउन सम्भव भएको बताउनुभएको थियो ।
उहाँले विरामीहरुको चापलाई ध्यानमा राखेर वीर अस्पतालमा चार वटा फार्मेसीको व्यवस्था गरिएको पनि मन्त्री पौडेललाई जानकारी गराउनु भएको थियो ।
Categorized in राष्ट्रिय
