उपप्रधान साथै स्वास्थ्य तथा जनसंख्या मन्त्री उपेन्द्र यादवले महिलाको विकास नभई समाज विकास हुन नसक्नेमा जोड दिएका छन् ।

काठमाडौंमा सम्पन्न एक कार्यक्रममा बोल्दै स्वास्थ्यमन्त्री यादवले परिवार, समाजलाई सहि बाटोमा बढ्ने शिक्षा महिलाले नै दिन सक्ने भएकोले समाजको विकास हुन महिलाकै विकास हुनुपर्ने बताएका हुन् ।

नेवार पत्रकारहरुको छाता संगठन नेवाः पत्रकार राष्ट्रिय दबूले ११४औं महिला दिवसको अवसरमा एक कार्यक्रमको आयोजना गरेर क्रियाशिल महिला पत्रकारहरुलाई साधना महिला पत्रकारिता सम्मान प्रदान गरेको हो ।

कार्यक्रममा मन्त्री यादवले ६ जना क्रियाशिल महिला पत्रकारहरुलाई सम्मान गरे । मन्तव्यको क्रममा उपप्रधानमन्त्री यादवले महिला पत्रकारहरु पत्रकारिता क्षेत्रमा मात्र नभएर हरेक क्षेत्रमा सम्मानयोग्य भएको धारणा राखे ।

गोरखापत्र दैनिककी यलु जोशी, नेपाल समाचारपत्रकी भगवती तिमल्सिना, नेपाल टेलिभिजनकी पवन वर्षा शाह, मेट्रो एफ एमकी रिता महर्जन, नयाँ पत्रिकाकी शान्ति तामाङ र स्वतन्त्र फोटो पत्रकार सुनी बनेपालीलाई सम्मान गरिएकाे थियाे ।

साधना महिला पत्रकारिता सम्मानको यो आठौँ संस्करण हो । सोही अवसरमा दबूको त्रैमासिक प्रकाशन नेपालभाषा पत्रिका ‘आज्जु’को पनि उपप्रधान मन्त्री यादवले बिमोचन गरेका थिए ।

दबूूका केन्द्रिय अध्यक्ष नृपेन्द्र लाल श्रेष्ठले दबूले क्रियाशिल पत्रकारहरुको प्रोत्साहन र सम्मान गर्नुका साथै, नेवार पत्रकारहरुको हक, अधिकारको लागि संस्थाले पाइला चालिरहने बताए ।

गलत इतिहासलाई सच्याउँदै वास्तविक इतिहास स्थापित गर्नको लागि दबूले संघर्ष गरीरहेको र गलतीलाई नसच्याइएसम्म आफुहरु चुप नलाग्ने उद्घोष पनि अध्यक्ष श्रेष्ठले गरे ।

समारोहमा दबूका सह सचिव एवं कार्यक्रम संयोजक सुनिता महर्जन, उपाध्यक्ष रचना श्रेष्ठले दबूको गतिविधि, उद्देश्य आदिको बारेमा प्रकाश पार्दै आफ्ना भनाई राखेका थिए ।

दबूका निवर्तमान अध्यक्ष सुरजबीर बज्राचार्य, कानूनी सल्लाहकार किरण शाक्य, केन्द्रिय सल्लाहकार विजयरत्न असंबरे, दबूको ललितपुर शाखा अध्यक्ष मन्जु बज्राचार्य लगायतले मन्तव्य राखेका थिए

Categorized in समाज