कोरोना महामारीका कारण मार्चको दोश्रो हप्ताबाट स्थगित भएको स्पेनिस ला लिगा तीन महिनापछि शुक्रवारबाट सुचारू भएको छ ।

महामारीका बीच सुचारु गरिएको लिगको पहिलो खेलमा सेभियाले रियल बेटिसलाई हराएको छ । बिहीबार राति खेलिएको खेलमा सेभियाले रियल बेटिसलाई २(० गोलले हराएको हो ।

खेलको पहिलो हाफ गोलरहित बराबरीमा सकिएको थियो ।

सेभियाले ५६ औं मिनेटमा पेनाल्टी पायो । अर्जेटिनी खेलाडी लुकास ओक्याम्पोसले पेनाल्टीलाई गोलमा परिणत गर्दै सेभियालाई अग्रता दिलायो । 

त्यसको ६ मिनेट पछि ६२ औं मिनेटमा ब्राजिलीयन खेलाडि फेर्नान्डो रेगेजेले सेभियाका लागि दोस्रो गोल गर्दै टिमलाई २–० को जीत दिलाए ।

यो खेलपछि सेभिया अंक तालिकामा २८ खेलबाट ५० अंक बटुल्दै तेस्रो स्थानमा छ ।

शिर्ष स्थानको बार्सिलोनाको २७ खेलबाट ५८ अंक छ भने दोस्रो स्थानको रियल म्याड्रिडको २७ खेलवाट ५६ अंक छ ।

सुरक्षालाई ध्यानमा राख्दै खेल खाली रंगशालामा भएको हो । तर खेलअघि सेभियाको घरेलु मैदान बाहिर दर्शकहरू उपस्थित भएका थिए ।

खेल सुरु हुनुअघि खेलाडिहरुले र उपस्थित सबैले कोभिड १९ का कारण ज्यान  गुमाएकाहरुको सम्झनामा एक मिनेट मौन धारण गरेका थिए ।

ला लिगा युरोपका शीर्ष पाँच लिग मध्ये कोरोना महामारीपछि सुचारू भएको दोस्रो लिग बनेको छ ।

यसअघि जर्मनको बुन्डेसलिगा पनि सुरु भएको थियो भने अर्को सातादेखि इंग्लिस प्रिमियर लिग पनि सुचारु हुँदैछ ।

Categorized in स्पाेर्ट्स