ललितपुरको रातो मच्छिन्द्रनाथको जात्रा सम्पन्न गर्न बनेको बुंगद्यः जात्रा व्यवस्थापन कार्यदलले जात्रालाई सम्पन्न गर्ने सहमति बनिसकेको अवस्थामा असम्वन्धित समूहले रथ तान्ने प्रयास गरेर स्थिती अराजक बनेको भन्दै खेद व्यक्त गरेको छ । 

कार्यदलले विज्ञप्ती जारी गर्दै कोभिड संक्रमणको अवस्थालाई मध्यनजर गरेर निषेधाज्ञा जारी रहेको समयमा आधिकारीकता विनाको असम्वन्धित समूहले रथ तान्ने प्रयास गरेको भन्दै खेद व्यक्त गरेको हो ।

असम्वन्धित समूहले रथ तान्ने प्रयास गर्दा स्थिती अराजक बनेको भन्दै यसमा ललितपुरका १९ वटै जातीय खलःपुचःको ध्यानाकर्षण भएको पनि कार्यदलले जनाएको छ ।

मच्छिन्द्रनाथको जात्रा कसरी सुरक्षित ढङ्गले सम्पन्न गर्ने भनी योजना बनाई सुझाव दिनका लागि लतिलपुरका १९ वटा जातीय संघसंस्था सम्मिलित कार्यदल बनेको छ भने उक्त कार्यदलमा ज्यापु समाजका अध्यक्ष चन्द्र महर्जन संयोजक रहेका छने ।

कार्यदलबाट जारी विज्ञप्तीमा गत भाद्र ११ गते ज्यापु समाज यलमा सरोकारवालाको विशेष वैठकले मलमास अगावै जात्रा सम्पन्न गर्ने विषयमा छलफल भएको र सोही अनुसार गुठी संस्थानको प्रधान कार्यालयबाट विज्ञहरुसँग परामर्श गरी आएको निचोड उपर जातीय खलःपुचःहरु, रकमी लगायत अन्य सम्वन्धित सबैको उपस्थितीमा हुने वैठकबाट पारित गर्ने सहमति भएको समेत जनाएको छ ।

सोही विज्ञप्तीमार्फत कोभिड संक्रमणको परिस्थितीलाई मध्यनजर गरी सबैको सहमतिमा यो साल हाल रथ भएकै स्थानमा सबै विधि प्रक्रिया पूरा गरी जात्रा सम्पन्न गर्ने कार्यदलले जानकारी दिएको छ ।

कार्यदलबाट जारी विज्ञप्ती अनुसार आउँदो १९ गते क्षमा पूजा गरिनेछ भने २१ गते सोहखुट्टे पाटिसम्म रथ तान्ने र छ्वयलाभू गर्ने, २२ गते भुज्याः मनाउने र साइत हेर्ने तय भएको छ भने साइत प्राप्त भएको दिन मच्छिन्द्रनाथलाई बुंगमति प्रस्थान गराइने भएको छ ।

Categorized in संस्कृति