सोलुखुम्बुको थामे गाउँमा आएको बाढीका कारण ओखलढुङ्गाको दुधकोशी किनारका बस्तीमा ब्यापक क्षति पुर्याएको छ ।

थामेखोलाको शिरतिर रहेका हिमताल फुटेर बाढी आएको आशंका गरिएको छ । दूधकोशीको सहायक खोला (थामे)मा शुक्रबार दिउँसो एक्कासी आएको बाढीले खुम्बु पासाङल्हामू गाउँपालिका वडा-५ मा पर्ने थामे गाउँ नराम्ररी प्रभावित भएको छ ।

स्थानीयका अनुसार केही दिनदेखि वर्षा भइरहेकोले माथिल्लो भेगमा रहेको हिमताल फुटेको हुनसक्ने स्थानीयको आशंका छ । बाढीका कारण खुम्बुपासाङल्हामु गाउँपालिका वडा नम्बर ५ को थामेमा घर, विद्यालय र छात्रवास गरी कम्तिमा एक दर्जन बढी संरचना बगाएको खबर छ ।

धेरैजसो होटलहरुमा क्षति भएको जनाइएको छ । सिंगो थामे गाउँभरि बाढी पसेकाले क्षतिको यकिन विवरण आउन नसकेको पनि प्रहरीले जनाएको छ । सोलुखुम्बुका प्रमुख जिल्ला अधिकारी (प्रजिअ) देवी पाण्डेका अनुसार अहिलेसम्म घर र होटल गरेर १२ वटा पूर्ण क्षति भएका छन् ।

हिमालय ट्रस्टको एउटा क्लिनिकमा क्षति भएको छ । एउटा विद्यालयमा पूर्ण क्षति भएको छ । सात वटा घर चाहिँ उच्च जोखिममा छन् । एक जना हराएको आशंका गरिएको छ । त्यसैगरी अन्य मानवीय क्षतिको कुनै विवरण प्राप्त भएको छैन ।

त्यहाँ भएका बुढाबुढी, केटाकेटीलाई नेपाली सेना र नेपाल प्रहरीले उद्धार गरिसकेको उनले बताए । थप कोही छ कि भनेर नेपाल प्रहरी र नेपाली सेनाले खोजिरहेको छ ।

जनताको बहुमूल्य सम्पत्ति संरक्षण गर्न र सुरक्षित रुपमा ल्याउनका लागि नेपाली सेना र नेपाल प्रहरीले घर-घरमा गएर ल्याएर सम्बन्धित व्यक्तिलाई दिने काम गरिरहेको प्रजिअ पाण्डेले बताए ।

थामेखोलमा बाढी आएपछि त्यसको असर दूधकोशी नदीमा पनि परेको छ । दूधकोशीमा पनि ठूलो बाढी आएको बताइएको छ । दूधकोशी नदी किनार आसपासका बस्तीहरुमा सतर्कता अपनाउन भनिएको पनि प्रहरीले जनाएको छ ।

यता सोलुखुम्बुको खुम्बु पासाङल्हामु गाउँपालिका–५, थामे खोलामा गएको बाढीबारे अध्ययन गर्न भोलि ९शनिबार० मात्र विज्ञसहितको टोली त्यसतर्फ जाने भएको छ ।

राष्ट्रिय विपद् व्यवस्थापन तथा न्यूनिकरण व्यवस्थापन प्राधिकरणका प्रमुख कार्यकारी अधिकृत (सीईओ) अनिल पोखरेलसहित विज्ञहरुको टोली त्यसतर्फ जान लागेको हो ।

टोलीले शुक्रबारै त्यसतर्फ जाने प्रयास गरेको भएपनि मौसम अनुकूल नभएका कारण भोलि मात्र जाने बताइएको छ ।

Categorized in राष्ट्रिय