‘मधुमेह र स्वस्थ जीवन’ भन्ने नाराका साथ आज विश्व मधुमेह दिवस मनाईंदैछ । नेपालमा पनि बिभिन्न कार्यक्रमको आयोजना गरी मनाइँदैछ ।

नेपालमा बढ्दै गएको मधुमेहको समस्या, यसको असर, पहिचान, उपचार र रोकथामका उपायबारे जनचेतनमूलक सन्देश दिने उद्देश्यले विभिन्न सरकारी तथा गैरसरकारी संस्थाहरुले कार्यक्रमहरु गर्ने गर्दछ ।

मधुमेह एउटा गम्भीर स्वास्थ्य समस्या हो जसका कारण प्रत्येक वर्ष १० लाखभन्दा बढी मानिसको ज्यान जाने गर्छ। चिकित्सकहरुका अनुसार पछिल्लो समय नेपालमा मधुमेहका बिरामीको संख्या अत्यधिक बढेको छ ।

बिशेष गरी बालबालिका, युवा र ज्येष्ठ नागरिक सबै उमेर समूह यसको जोखिममा रहने गरेका छन् । यसलाई चिकित्सकीय भाषामा 'डाइअबीटीज' भनिन्छ।

रगतमा चिनीको मात्रा बढी हुने भएकाले यसलाई 'सुगर' वा 'चिनी रोग' पनि भन्ने गरिएको छ। शरीरले रगतमा भएको सबै चिनी (ग्लुकोज) प्रशोधन गर्न नसक्दा मानिसमा हृदयाघात, मस्तिष्काघात र अन्धोपन हुन सक्छ अनि मिर्गौलाले काम गर्न छाड्ने अवस्था पनि निम्तिन सक्छ।

मधुमेहको समस्या विश्वभरि निरन्तर बढिरहेको छ। विश्वभरि अनुमानित ४२ करोड मानिस मधुमेहबाट पीडित छन्। अहिलेको सङ्ख्या ४० वर्षअघिको भन्दा चारगुना बढी भएको विश्व स्वास्थ्य सङ्गठनले जनाएको छ।

मधुमेह हुनबाट जोगिने सबैभन्दा प्रभावकारी उपाय तौललाई नियन्त्रणमा राख्ने र शारीरिक रुपमा क्रियाशील रहि मधुमेहको जोखिम कम गर्न सबैलाई स्वास्थ्य तथा जनसंख्या मन्त्रालयले अपील गरेको छ ।

जोखिम भए पनि मधुमेह भएका आधाभन्दा धेरै मानिसहरूलाई यो रोगबारे थाहा नै छैन। तर जीवनशैली परिवर्तन गर्दा धेरैमा यो जोखिम नियन्त्रण गर्न सकिन्छ।

Categorized in राष्ट्रिय