गोपाल कृष्ण महर्जनबाट गाइएको नेपालभाषाको गीत ‘अयलाः अयलाः’ को म्यूजिक भिडियो सार्वजनिक भएको छ ।

आज (शनिबार) काठमाडौं सुन्धारास्थित सिटिसि मलमा रहेको सिडिसि सिनेमामा उक्त म्यूजिक भिडियो प्रिमियर गरिएको हो । म्यूजिक भिडियो प्रिमियरको दौरान दर्शकदीर्घाको उपस्थिती निकै बाक्लो हुँदा दुई शो गरी गीत प्रदर्शन गरिएको थियो ।

दर्शकहरुको प्रतिक्रियाबाट आफु निकै उत्साहित भएको निर्देशक सुरेन्द्र तुलाधरले बताए ।

सृष्टि महर्जनसँगै चर्चित अभिनेता पल शाह अभिनित म्यूजिक भिडियो हेर्दा ठुलै बजेटमा निर्माण गरिएको अनुमान लगाउन सकिन्छ ।

म्यूजिक भिडियाेका निर्माता समेत रहेका गायक महर्जनले राम्रै म्यूजिक भिडियो बनाउने उद्देश्यले आफुले बजेटमा कुनै सम्झौता नगरेको बताए ।

‘नेपालभाषाको गीत भन्ने वित्तिकै बजेट खुम्च्याउनुपर्ने के आवश्यकता छ र ? बनाएपछि राम्रै बनाउनुपर्छ, राम्रो म्यूजिक भिडियो बनाउन बजेटमा कुनै सम्झौता गरेको छैन’ गायक महर्जनले बताए ।

गीतको छायाङ्कन कीर्तिपुरस्थित ससःत्वाः, ठमेलस्थित १०ह् र टेकुस्थित बम्बीर शिवालय ट्रस्टमा गरिएको छ ।

गीतको परिकल्पना पनि निर्देशक तुलाधरकै रहेको छ । डान्स नम्बर गीतको कोरीयोग्राफी रोहिया महर्जनले गरेकी छिन् ।

सौरभ लामाको डिओपीमा इश्वर लाल सिंकेमनाले छायाङ्कन गरेका छन् । दृश्य सम्पादन सुजन बडालले गरेका छन् ।

शब्द रचना पवन जोशीको छ भने संगीत अनिल तुलाधरले दिएका छन् । सिडिसि सिनेमामा प्रिमियर गरिएसँगै यो म्यूजिक भिििडयो ओएसआर डिजिटल युट्युब मार्फत सार्वजनिक भइसकेको छ ।

युट्युबमा सार्वजनिक भएको एक घन्टामै यस म्यूजिक भिडियोको भ्यूज १० हजार नजिक पुगिसकेको छ ।

Categorized in पेजथ्री