क्रिकेट विश्वकपमा आज भारत र अफ्गानिस्तान भिड्डै
SamacharDesk – आकाश राजोपाध्याय | २०८० आश्विन २४, बुधबार
आईसीसी एकदिवसीय क्रिकेट विश्वकपमा आयोजक भारतले बुधबार अफ्गानिस्तानसँग खेल्दैछ ।
भारत विरुद्ध अफ्गानिस्तानको खेल दिल्लीस्थित अरुण जटेली स्टेडियममा नेपाली समय अनुसार दिउँसो सवाँ २ बजे सुरु हुनेछ ।
भारतीय भुमिमा भारतसँगै अफगानिस्तानले पहिलो पटक एकदिवसीय म्याच खेल्न लागेको हो ।
भारत र अफगानिस्तान वान डे क्रिकेटमा अहिलेसम्म तीन पटक आमने सामने भएका छन् । जसमा भारतले दुई खेलमा जित दर्ता गरेको थियो भने अर्को एक खेल बराबरीमा सकिएको थियो ।
धर्मशालामा भएको पहिलो खेलमा बंगलादेशसँग पराजित अफगानिस्तानले भने आज पहिलो जितका लागि कोशिश गर्नेछ ।
यसअघि रोहित शर्मा नेतृत्वमा रहेको भारतले अष्ट्रेलियामाथि ६ विकेटको शानदार जित सहित प्रतियोगितामा सुखद सुरुआत गरीसकेको छ ।
यस्तै आजको खेलमा भारत लगातार दोस्रो जितको खोजीमा हुनेछ ।
आज हुने खेलको स्टेडियमको बाउन्ड्री छोटो भएको कारण आज धेरै रनको आँकडा बन्ने अपेक्षा गरिएको छ ।
Categorized in स्पाेर्ट्स
