इजरायल र हमास युद्धमा मारिने १० मध्ये ४ जनाको शव आज विहान काठमाडौं आइपुगेको छ ।

इजरायल सरकारले पहिचान भएका ४ शवको कानुनी प्रक्रिया पूरा गरेर नेपाली दूतावासलाई बुझाएसँगै शव नेपाल ल्याउने प्रकृया अगाडी बढाईएको थियो ।

पहिलो चरणमा नारायणप्रसाद न्यौपाने, लोकेन्द्रसिंह धामी, दिपेशराज बिस्टको शव नेपाल आइपुगेको छ । दोस्रो चरणमा आशिष चौधरीको शव ल्याईएको हो ।

बाँकी ६ नेपालीको शव पहिचान गर्ने र कानुनी प्रक्रिया पूरा गर्ने क्रममा रहेको दूतावासले जनाएको छ ।

शव आजै नेपाली सेनाको हेलिकप्टरमार्फत कैलालीको धनगढी लैजाने तयारी रहेको बताईएको छ ।

शव नेपाल आईपुगेसंगै परराष्ट्रमन्त्री नारायणप्रसाद साउद र नेपालकालागि इजरायली राजदूत हाना गोडरलगायतले श्रद्धाञ्जली अर्पण गर्नु भएको थियो ।

कृषि विषय पढ्दै कमाउँदै गर्न इजरायलमा पुगेका नेपाली विद्यार्थीहरु गत असोज २० गते हमासले गरेको आक्रमणमा परेका थिए ।

आक्रमणमा १० जना नेपालीको मृत्यु भएको पुष्टि भए पनि एक जना विपिन जोशीको अवस्था भने अझै अज्ञात छ ।

उनको खोजी भइरहेको दूतावासले जनाएको छ ।

Categorized in राष्ट्रिय