बारा कलैयाबाट चोरीको मोटरसाइकलसहित प्रहरीले दुई जनालाई  पक्राउ गरेको छ । 

कलैया उपमहानगरपालिका ४ स्थित बिगन महतोको घरबाट चोरी भएको बा.७६ प १६९४ नम्बरको मोटरसाइकलसहित २ जनालाई प्रहरीले पक्राउ गरेको हो ।

प्रहरीले उनीहरुलाई सिम्रौनगढ नगरपालिका ९ स्थित अडुवा खोलाको पुलबाट पक्राउ गरेको हो ।

पक्राउ पर्नेहरुमा कलैया उपमहानगरपालिका ३ बस्ने १९ वर्षीय सरफराज मियाँ र सोही ठाउँ बस्ने २२ वर्षीय जफिर आलम रहेका छन् । 

बारा देवताल गाउँपालिका ३ बस्ने राजु कुमार कुशवाहाको उक्त मोटरसाइकल र मोबाइल समेत चोरी भएको थियो ।

चोरीको खबर पछि ईलाका प्रहरी कार्यालय सिम्रौनगढ बाराबाट खटिएको प्रहरीले चोरी गरेको मालसामान तथा ४ थान मोबाइलसहित सोही मोटरसाइकलमा भागिरहेको अवस्थामा फेला पारी पक्राउ गरेको हो । 

उनीहरु उपर चोरी मुद्दामा थप अनुसन्धान भइरहेको जिल्ला प्रहरी कार्यालय बाराले जनाएको छ ।   

त्यसैगरी कैलालीमा चोरी मुद्दाका फरार एक जनालाई प्रहरीले पक्राउ गरेको छ ।

धनगढी उपमहानगरपालीका १० घुईयाघाट बस्ने २५ वर्षीय दिनेश रानालाई शुक्रबार प्रहरीले पक्राउ गरेको हो ।

रानालाई जिल्ला अदालत कैलालीको २०७६ जेठ १५ गतेको फैसलाले मोटरसाइकल चोरी मुद्दामा १ लाख ७० हजार रुपैयाँ जरिवाना र ६ दिन कैद सजाय तोकिएको थियो । 

सो मुद्दामा फरार रहेका उनलाई जिल्ला प्रहरी कार्यालय कैलालीबाट खटिएको प्रहरीले उनकै घरबाट पक्राउ गरेको हो ।

Categorized in अपराध