कोरोना संक्रमित मृत्यु संख्या १३ पुग्यो
SamacharDesk – विकाश | २०७७ जेठ २४, शनिबार
नेपालमा कोरोना संक्रमितको मृत्यु संख्या १३ पुगेको छ । आज स्वास्थ्य तथा जनसंख्या मन्त्रालयले थप २ जना कोरोना संक्रमितको मृत्यु पुष्टि गरेपछि मृत्यु संख्या १३ पुगेको हो ।
स्वास्थ्य तथा जनसंख्या मन्त्रालयको नियमित प्रेस व्रिफिङमा आज प्रवक्ता डा. विकास देवकोटाले दुई जना संक्रमितको मृत्यु पुष्टि गर्नुभयो ।
गत जेठ २१ गते मृत्यु हुने डोल्पाका ५८ वर्षीय पुरुषको आज आएको पिसिआर परिक्षणको रिपोर्टमा उनमा कोरोना पोजेटिभ देखिएको प्रवक्ता डा. देवकोटाले बताउनुभयो ।
मृत्यु हुने डोल्पा जगदुल्लाका पुरुष गत जेठ १६ गते सुर्खेतबाट गएर १८ गते डोल्पा पुगेका थिए डोल्पा पुगेर क्वारेन्टाइनमा बसेका उनको जेठ २१ गते राती २ बजे मृत्यु भएको थियो ।
कर्णाली स्वास्थ्य विज्ञान प्रतिष्ठान जुम्लामा गरिएको उनको स्वाबको पिसिआर परिक्षणको रिपोर्टमा कोरोना पोजेटिभ देखिएको देवकोटाले जानकारी दिए ।
मृतक व्यक्ति दमको रोगी भएको बताइएको छ ।
मृतकको कन्ट्याक्ट ट्रेसिङ र सहजीकरणको लागि कर्णाली स्वास्थय विज्ञान प्रतिष्ठानको टोली उतातिर हिँडिसकेको देवकोटाले बताउनुभयो ।
त्यसैगरी जेठ २३ गते मृत्यु भएकि धनगढीकी ५५ वर्षीया महिलामा पनि कोरोना पोजेटिभ देखिएको छ ।
मृगौला रोगबाट पिडित उनी गत जेठ २३ गते डायलासिस गराउन सेती अस्पताल पुगेकी थिइन् ।
अस्पतालमा डायलासिस गर्दै गर्दा दिउँसोको करीब १२ बजेतिर उनको मृत्यु भएको थियो ।
सेती अस्पतालमा गरिएको स्वाब परिक्षणमा उनमा पनि कोरोना संक्रमण पुष्टि भएको छ ।
उनमा कुनै पनि किसिमको कोभिडको लक्षण नदेखिएको बताइएको छ ।
आज पुष्टि भएका यी दुई मृत्युमा पनि मृत्यु पछि मात्र संक्रमण पुष्टि भएको छ ।
नेपालमा कोरोना संक्रमितको अहिलेसम्म भएको १३ मृत्युमध्ये ११ वटामा मृत्युपछि मात्रै संक्रमण पुष्टि भएको हो ।
Categorized in समाज
