चर्चित अभिनेता पल शाह अभिनित नेपालभाषाको म्यूजिक भिडियो भोलि शनिवार सार्वजनिक हुँदैछ ।

अभिनेता शाह र सृष्टि महर्जन अभिनित गायक गोपाल कृष्ण महर्जनको गीत ‘अयलाः अयलाः’ भोलि शनिबार सार्वजनिक हुन लागेको हो ।

भोलि शनिबार काठमाडौंको सुन्धारामा सिटिसि मलमा रहेको सिडिसि सिनेमामा एक कार्यक्रम गरी उक्त म्यूजिक भिडियो सार्वजनिक गर्न लागिएको छ ।

नेपालभाषाको संगीत क्षेत्रमा फरक खालको एउटा गीत दिन खोजेको गायक महर्जनले बताएका छन् ।

‘मलाई जहाँसम्म लाग्छ, हाल सार्वजनिक भइरहेका गीतहरु भन्दा शब्द, संगीत, संगीत संयाेजक सबै पक्षबाट यो गीत फरक र रमाइलो खालको बनेकाे छ । गीत अनुसार नै यसको म्यूजिक भिडियो बनाएका छौं, बाँकि अब दर्शककै हातमा’ गायक महर्जनले भने ।

म्यूजिक भिडियोको निर्देशन नेपालभाषाको चलचित्र क्षेत्रका व्यस्त र चर्चित निर्देशक सुरेन्द्र तुलाधरले गरेका छन् ।

डान्स नम्बरको रुपमा रहेको गीतको छायाङ्कन कीर्तिपुरको ससःत्वाः, 10X ठमेल र बम्बीर शिवालय ट्रस्ट टेकुमा गरिएको छ ।

गीतमा दुई जना प्रेमी बीचको प्रेम सम्वन्धलाई नै कथावस्तुको रुपमा देखाउन खोजेको निर्देशक तुलाधरले बताए ।

‘दर्शकलाई आनन्द र रमाईलोको अनुभव होस् भन्ने सोचेरै लोकेशन र लोकेशन सुहाउँदो ड्रेस, लाइटिङ आदिलाई ध्यान दिएको छु । राम्राे म्यूजिक भिडियो बनोस् भनेर मेहनत पनि त्यहि हिसाबले गरेको छु’ निर्देशक तुलाधरले बताए ।

म्यूजिक भिडियोको छायाङ्कन इश्वर लाल सिंकेमना र दृश्य सम्पादन सुजन बडालले गरेका छन् । त्यसैगरी गीतको शब्द रचना चर्चित निर्देशक साथै रचनाकार पवन जोशीले गरेका छन् भने संगीत अनिल तुलाधरको रहेको छ । कार्यक्रममा प्रिमियर भए लगत्तै उक्त गीत ओएसआर डिजिटल युट्युब च्यानलमार्फत विश्वव्यापी सार्वजनिक हुँदैछ । 

Categorized in पेजथ्री