चलचित्र निर्देशक प्रदिप खड्गीले आफ्नो फेसबुकको भित्तामा लेखे, ‘its hard, not to fail, but there is always chance to success' अर्थात असफल नहुन गार्हो छ, तर जितको सम्भावना जहिल्यै हुन्छ ।

उनको यो प्रेरणादायी शब्दसँगै उनको खुसी पनि झल्किन्थ्यो । खुसी नहुनु पनि किन, प्रथम पुरस्कार जित्नु नै खुसिको कुरा थियो, फेरी पहिलो पुरस्कारसँगै आफ्नै टिमबाट सान्त्वना पुरस्कारसमेत जितेको क्षण ।

प्रसङ्ग हो, कीर्तिपुर नगरपालिकाबाट आयोजित नेपालभाषाको लघु चलचित्र प्रतियोगीताको । कीर्तिपुर नगरपालिकाबाट आयोजित नेपालभाषाको लघु चलचित्र प्रतियोगीतामा सहभागी ७ वटा चलचित्रको प्रिमियरको साथमा विजेताको घोषणा शनिबार काठमाडौंमा आयोजित कार्यक्रमबीच भयो ।

प्रतियोगीतामा डेल्टा मल्टिमिडिया प्रोडक्सनको ब्यानरमा निर्मित, प्रदीप खड्गीले निर्देशन गरेको चलचित्र ‘साःगः’ ले प्रथम पुरस्कार जितेको छ । प्रथम पुरस्कार जितेको चलचित्रले प्रमाणपत्र, ट्रफिको साथमा एक लाख रुपैयाँ हात पारेको छ ।

त्यस्तै दोश्रो पुरस्कार नेवाः युट्युबको ब्यानरमा निर्मित ‘आजुद्यः’ ले जितेको छ भने शशिकला मानन्धरको प्रस्तुति ‘लाखय् पाः’ तेश्रो हुन सफल भयो । दोश्रो भएको चलचित्रलाई ७५ हजार रुपैयाँ र तेश्रो चलचित्रले ५० हजार रुपैयाँ हात पारेको छ ।

फोकस पिक्चर्सको ब्यानरमा निर्मित भाईकाजी महर्जन ‘नयन’को निर्देशन रहेको ‘न्हय्का सिँ’ ले सान्त्वना पुरस्कार जितेको छ । सान्त्वना पुरस्कारवापत २५ हजार रुपैयाँ दिइएको थियो । सहभागी सबै चलचित्रलाई १०/१० हजार रुपैयाँ दिइएको थियो ।

नेपालभाषाका चलचित्र प्रतियोगीताहरुमा यो अहिलेसम्मकै सर्वाधिक राशी पुरस्कार हो ।

कार्यक्रममा संस्कृति, पर्यटन तथा नागरिक उड्डयनमन्त्री भानुभक्त ढकालले कीर्तिपुरको विकासका लागि सरकारले आवश्यक सहयोग गर्ने प्रतिवद्धता व्यक्त गर्नुभयो ।

कीर्तिपुर नगरपालिकाका प्रमुख रमेश महर्जनले चलचित्रको माध्यमबाट कीर्तिपुरको ईतिहास उजागर गर्नको साथै समाजमा मौखिक रुपमा जिवित रहेका किम्वदन्ति, लोक कथा जस्ता लोक सम्पत्तिहरुको अध्ययन अनुसन्धानको लागि प्रतियोगीताको आयोजना गरिएको बताउनुभयो ।

प्रतियोगीतामा कीर्तिपुरसँग सम्वन्धित किम्वदन्ति, ईतिहास र संस्कृतिमा आधारित भएर बनाइएका चलचित्र मात्र समावेश गराइएको थियो ।

कलाकार लक्ष्मीकुमार महर्जनको संयोजनमा प्रतियोगीता सम्पन्न भएको थियो ।

रामकृष्ण दुवालको संयोजनमा वरिष्ठ निर्देशक पवन जोशी, निर्देशक र कलाकार रामकृष्ण खड्गी, दृश्य सम्पादक साथै ग्राफिक्सकर्मी रजिन महर्जन र कलाकार पल्पसा डंगोल सम्मिलित निर्णायक मण्डलले विजेता चलचित्रको चयन गरेको थियो ।

Categorized in पेजथ्री