उत्तरी गोलार्धमा ओजोन सतहमा देखिएको प्वाल बन्द भएको छ । 

कपर्निकस एट्मसफेयर मोनिटरिङ सर्भिस (सीएएमएस) ले ट्वीट गर्दै यसै वर्षको मार्चमा उत्तरी गोलार्ध्दको ओजोन सतहमा देखिएको सबैभन्दा ठुलो प्वाल बन्द भएको जनाएको हो ।

मार्चको अन्तिमतिर सीएएमएसका वैज्ञानिकहरुले आर्कटिक क्षेत्रमा एउटा ठुलो खाली ठाउँ देखेका थिए । अहिलेसम्म वायुमन्डलमा यत्रो ठुलो भ्वाङ नदेखेको ती वैज्ञानिकहरुले बताएका थिए ।

आर्कटिक क्षेत्रमा वायुमन्डलको माथि ओजोन सतहमा साना प्वाल देखिसकेको सीएएमसले जनाएको छ । 

तर यति ठुलो प्वाल देखिएको पहिलो पटक भएको भन्दै सिएएमएसले यो चिन्ताको विषय भएको बताएको थियो ।

सीएएमएसले त्यो ठुलो प्वाल ओजोनमा आउँदै गरेको ठुलो समस्याको एउटा लक्षण भएको बताएको छ । 

वार्षिक चक्रका कारण मात्र अहिले यो बन्द भएको तर दीगो समाधान भने नभएको सीएएमएसले ट्वीटमा जनाएको छ ।

ओजोन सतहमा सुस्त गतीमा सुधार आइरहेकोले आशा गर्न सकिने पनि सीएएमएसले जनाएको छ ।

सन् १९९६ मा क्लोरोफ्लोरोकार्बनको प्रयोग बन्द गरिएपछि यसमा विस्तारै सुधार देखिन थालेको हो ।

ओजोन सतहले पृथ्वीलाई सूर्यको हानिकारक किरणबाट आवश्यक सुरक्षा दिने गर्दछ ।

जमीनबाट १०–४० किलोमीटरको उचाईमा रहेको ओजोन सतहले पृथ्वीलाई अल्ट्राभ्वाइलेट विकिरणबात बचाउन मद्दत गर्ने गर्दछ । 

यस रक्षा कवचमा कुनै पनि प्वालले यहाँ हिउँ पगलिने गतिलाई बढाउँदछ । साथमा मानिसहरुमा छालाको क्यान्सर र रतन्धो जस्ता स्वास्थ्य समस्या पनि ल्याउन सक्छ ।

Categorized in विज्ञान-प्रविधी